د زندانونو چارو د تنظیم ادارې د مسولینو له لوري په زندانیانو، محجوزینو او توقیف شویو د ژمنیو کڅوړو د ویش بهیر پیل شوی.
د زندانونو چارو د تنظیم ادارې لوی رییس مولوي محمد یوسف مستري وایي، څلور زره ژمنۍ کڅوړې، د خیریه بنسټونو په همکارۍ پر زندانیانو ویشل کیږي؛ چې پکې کمپلې، ګرمې ژمنۍ جامې، د مینځلو مواد، او نور د اړتیا وړ توکې شامل دي.
د زندانونو چارو د تنظیم ادارې رییس زیاته کړې، محبوسین او محجوزین له دوی سره امانت دي او له همدې امله دوی د زندانیانو لپاره د لا ډیرو اسانتیاوو د رامنځته کولو په هڅه کې دي.
زندانیان خوښ دي چې د زندانونو چارو تنظیم ادارې له لورې ورته سهولتونه برابریږي او مننه کوي چې ستونزو ته یې رسیدنه کیږي.
د زندانونو چارو د تنظیم ادارې مسولین زیاتوي چې په شته امکاناتو او د مرسته کونکو بنسټونو په همکارۍ د محبوسینو او محجوزینو لپاره یې د روغتیا، اوسېدو ځای او خوراک برخو کې امکانات برابر کړي دي.