ملي دفاع وزارت وايي، چې د ۳۱۳ مرکزي قول اردو د ښوونې او روزنې مدیریت د ډلهییزو زدهکړو له دوه نیم میاشتنۍ دورې څخه ۲۵۰ منسوبین فارغ شول.
ملي دفاع وزارت په وینا، د همدې په تړاو جوړې شوې مراسمو کې د ۳۱۳ مرکزي قول اردو مرستیال، ملا محمد حافظ مجاهد او د دې وزارت یو شمېر مسوولین ګډون درلود.
یاد وزارت زیاته کړې چې ښاغلي مجاهد په خپلو خبرو کې د اعداد په اهمیت ټینګار وکړ او ځوان منسوبین یې د زده کړو دوام، مسوولیتونو ته پاملرنې، ولس سره همکارۍ او ښې رویې ته راوبلل.
نوموړي زياته کړې:«تر دې دمه تاسې د دغو درسونو تمریناتي پړاوونه وهلي، خو اوس تاسې عملاً ټولنې ته د خدمت یو لوی مسؤلیت درسپارل کېږي. باید تل ویښ، بیداره او ځیرک واوسئ په پوره مېړانې او مهارت سره د خپلو ولسونو او د هېواد له ځمکنۍ بشپړتيا څخه په کلک او ايماني عزم به ساتنه کوئ.»
په پای کې فارغانو د هېواد په هر ګوټ کې خدمت کولو ته چمتوالی وښود او مراسم د بری لیکونو په ورکولو سره پای ته ورسېده.