د ارشاد، حج او اوقافو وزیر شیخ نورمحمد ثاقب په خپل کاري دفتر کې له اریانا افغان او کام ایر هوایي شرکتونو له مسولینو سره د ۱۴۴۶هـ ق کال سعودي عربستان ته ۳۰ زره حاجیانو د لیږد او رالیږد تړون لاسلیک کړ.
دغه غونډه چې د ارشاد، حج او اوقافو وزیر تر مشرۍ لاندې جوړه شوې وه، پکې د دې وزرات د مقام مرستیال، مرکزی ریاستونو رییسانو او علماوو د اریانا افغان هوایي شرکت رییس، د کام ایر هوایي شرکت مرستیال او د یادو شرکتونو تخنیکي او مسلکي کارمندانو ګډون کړی وو.
په یاده غونډه کې د ارشاد، حج او اوقافو وزیر ویلي، سږکال هم د تېرو کلونو په څیر د حج دیني او ملي پروسه د الله ﷻ په فضل او نصرت سره په ښه توګه پرمخ روانه ده.
نوموړي زیاته کړې؛ دواړه داخلي هوايي شرکتونه غواړي په دیني او ملي جذبې سره د حج دغه ملي پروسه مخته یوسي، ترڅو په دغه ستره دیني او ملي پروسه کې خپل مسولیت په ښه ډول ترسره کړي.
همدارنګه شیخ نورمحمد ثاقب ویلي؛ د افغانستان اسلامي امارت هوډ لري، چې افغانستان په بېلا بېلو برخو کې په ځان بسیا کړي، لکه څنګه چې د حج په دغه ملي پروسه کې د حاجیانو لیږد او رالیږد زموږ داخلي شرکتونه ترسره کوي، په نورو بېلابېلو برخو کې هم هڅه کوو چې د ځان بسیاینې په لور ګامونه واخلو.
نوموړي هیله څرګنده کړې، چې د نورو کلونو په څیر سږ کال هم حاجیان د منظم مهال وېش له مخې سعودي عربستان ته انتقال او بیرته راستانه کړل شي.
ورپسې د اریانا افغان او کام ایر هوایي شرکتونو مسولینو د ارشاد، حج او اوقافو وزارت له هلو ځلو او منظمو پروګرامونو څخه ستاینه کړې او له خپل لوري یې د هر ډول ښه خدمت وړاندې کولو ژمنه کړې او ویلي یې دي؛ هیله لرو چې خپلو ټولو امکاناتو او شته ظرفیتونو ته په کتو حاجیانو ته هر ډول اسانتیاوې برابرې کړو.
دوی زياته کړې؛ هڅه به وکړو چې له وزارت سره په همغږۍ د هېواد د ننه او بهر د حاجیانو د لیږد او را لیږد پروسه په ښه ډول مدیریت کړو او دواړه شرکتونه به د هېواد له څلورو پروازي زونونو او په سعودي عربستان کې په دواړو هوایي ډګرونو (مدینه منوره او جده) کې حاجیانو ته ښه خدمتونه وړاندې کړو.
یادو مسولینو ویلي؛ د حاجيانو لېږد او رالیږد سوداګري نه، بلکې خپله ديني او ملي وجيبه ګڼو او په بشپړ توګه تخنیکي او عملیاتي چمتووالی ورته لرو.