د ملي دفاع وزارت وایي؛ د عبدالله بن مسعود رضي الله عنه د جګړه ایزو ګډو زده کړو قوماندانۍ له مسلکي زده کړو څخه د بېلابيلو قول اردوګانو د تعلیمي مراکزو څخه ۱۰۵ تنه استادان فارغ شول.
په دې اړه جوړو شویو مرسمو کې د ملي دفاع وزارت د تعلیماتو او پرسونل مرستیال حافظ عبدالمجید ګډون درلود.
د تعلیماتو او پرسونل مرستیال حافظ عبدالمجید یادو فارغانو ته له اِعداد څخه د فراغت مبارکۍ ویلو تر څنګ اړینې لارښوونې کړې او ویلي یې دي؛ خپل اعداد ته متوجې شئ، له دښمن سره د مقابلې لپاره چمتووالی ونیسئ، پر وړاندې يې له بېلا بیلو تکتیکونو څخه کار واخلئ او له غفلت څخه ځان وساتئ.
همداراز نوموړي زیاته کړې، د اسلامي اردو په لیکو کې په زړورتیا، میړانه او پاک نیت سره خپل مسولیتونه سرته ورسوئ.
د یادونې وړ ده، چې یادو فارغانو ته د جګړه ایز ملاتړ او جګړه ایزو ځواکونو ښوونځيو په توپچي، انجینري، مخابرې او ګڼ شمير نورو برخو کې د مسلکي او مجربو استادانو له لوري درې میاشتنۍ زده کړې ورکړل شوې دي.
ورته مهال نویو فارغانو اسلامي نظام ته د خدمت په پار بشپړ چمتووالی ښودلی او غونډه فارغانو ته د مسولینو له لوري د بری لیکونو په ورکولو سره پای ته رسېده.