د کرنې، اوبولګولو او مالدارۍ وزارت وايي؛ مولوي عطاالله عمري د خپل کارپه دفتر کې د کندا فروټ شرکت له رییس جلالالدین سعید سره لیدنه وکړه.
ياد وزارت زیاتوي، په دې لیدنه کې د هېواد په مرکز او بندرونو کې د حیواني او نباتي محصولاتو د ازموینې لابراتوارونو د جوړولو په اړه خبرې وکړې.
ناسته کې د کرنې وزیر ټینګار وکړ، لابراتوارونه باید داسې جوړ شي، چې پکې صداقت او امانت وساتل شي او د حیواني او نباتي محصولاتو اصلي ماهیت او کیفیت په دقیقه او شفافه توګه وڅېړل شي.
د دې وزارت د معلوماتو له مخې، یاد لابراتوارونه به د کرنې وزارت د کرنیزې پرمختیا صندوق او د کندا فروټ شرکت په مشارکت جوړېږي، چې موخه یې د محصولاتو د کیفیت د څارنې ښه والی او په بندرونو او مرکزي سیمو کې د ارزونې بهیر اسانه کول دي.