غزه کې د اوربند هوکړې پر بنسټ نن (شنبه، د فبروري ۱۵مه) حماس اسلامي غورځنګ ۳ اسرائیلي بندیان ازادوي او په بدل کې به یې اسرائیلي رژیم ۳۶۹ فلسطینیان خوشي کړي.
حماس اسلامي غورځنګ اعلان کړی، چې نن به درې نور اسرائیلي بندیان خوشي کړي.
د الجزیرې د راپور له مخې، صهیونیستي رژیم به یې هم په مقابل کې ۳۶۹ فلسطیني اسیران خوشي کړي.
حماس اسلامي غورځنګ تېره دوشنبه اعلان وکړ، چې د اسرائیلو له لوري غزه کې د اوربند هوکړې د سرغړونې له امله یې د پاتې بندیانو خوشي کول ځنډولي.
حماس ویلي؛ قاهره کې له خبرو وروسته د مصر او قطر منځګړو تایید کړې، چې دوی به د اوربند تړون د پلي کېدو پر وړاندې “پراته خنډونه” لېرې کړي.
مصري او قطري لورو هم ویلي، چې رامځته شوې ستونزې حل شوې دي.