د هندي رسنیو د راپورونو له مخې، د نوي ډیلي د اورګاډي په یوه تمځای کې د ګوڼې ګوڼې له امله لږ تر لږه ۱۸ کسان مړه شوي، چې ۱۴ یې مېرمنې دي. پر دې سربېره ګڼ نور کسان ټپیان شوي هم دي.
ویل کېږي، چې دا کسان په کلني مذهبي جشن کې د ګډون لپاره اورګاډو ته په تمه وو او غوښتل یې، چې پریاګراج ښار ته سفر وکړي.
پریاګراج ښار له نوي ډیلي څخه شاوخوا ۶۲۴ کیلو متره لیرې پروت دی او د هندوانو کلني مذهبي مراسم پکې ترسره کېږي.
د ټولنیزو رسنیو په خپرو شویو ویدیوګانو کې ښکاري، چې خلک ډکو اورګاډو ته د ختلو هڅه کوي.
هندي رسنۍ وايي، چې په بیړه اورګاډو ته د ختلو له امله وضعیت له کنټروله ووت او ګڼ مسافر بېهوښه شول.