صنعت او سوداګرۍ وزارت وايي، د روان لمریز کال په لومړیو لسو میاشتو کې یې هند ته د ۵۴۱ میلیون امریکايي ډالرو په ارزښت انځر، وچه او تازه میوه، انجه او زعفران صادر کړي دي.
دوه ورځې وړاندې هندي رسنیو د دغه هېواد د سوداګرۍ وزارت له قوله راپور ورکړی، چې په تېرو درېیو کلونو کې د افغانستان او هند سوداګري پراخه شوې او هند ته د افغانستان د صادراتوکچه د وارداتو پرتله لوړه شوې ده.
بل لور ته افغان سوداګر بیا وايي، هندوستان د افغانستان وچې او تازه میوې او سبزیجاتو لپاره ښه بازارونه لري، که چېرې د چابهار بندر کې شته ستونزې هوارې شي هند سره به د افغانستان سوداګري لا پیاوړې شي.
دا په داسې حال ده، چې د اسلامي امارت په بیا واکمنۍ سره له هند سربیره ایران ، چین او د منځنۍ اسیا هېوادونو سره د افغانستان سوداګري پراخه شوې او د صادراتو کچه يې لوړه شوې ده.