د کډوالو او بېرته راستنېدونکو چارو وزارت وايي؛ مولوي عبدالکبیر هغه سوداګر او د خېریه بنسټونو استازي ستایلي، چې له بېوزله افغان کډوالو سره یې مرستې کړې دي.
د ستاینې په تړاو جوړه شوې غونډه کې مولوي عبدالکبیر ویلي، چې اقتصادي پرمختګ او هېواد کې د کاري فرصتونو رامنځته کول د اسلامي امارت لومړیتوب دی او کوښښ کوي چې له دې لارې اړمنو ته د ښه ژوند زمینه برابره کړي.
مولوي عبدالکبیر یو ځل بیا په کوربه هېوادونو غږ کړی، چې له افغان کډوالو سره ښه چلند وکړي او د هغوی پر وړاندې له تاوتریخوالي لاس واخلي.
همدارنګه د ناستې پر دوام نوموړي د سوداګرو او پانګوالو له هڅو ملاتړ کړی او ډاډ یې ورکړی، چې مرستې به یې په شفاف ډول تر اړمنو ورسول شي.
ورته مهال په دغه لیدنه کې سوداګرو او د خېره بنسټونو استازو ویلي؛ خصوصي سکتور هوډ لري، څو د اسلامي امارت په همکارۍ راستنېدونکو افغان کډوالو ته د کار ښه زمینه برابره کړي.
په پاي کې یادو سوداګرو او پانګوالو د کډوالو او راستنېدونکو چارو د وزارت د هڅو په ستایلو سره د ورته ناستو د جوړېدو غوښتنې کړې دي.