د کرنې، اوبولګولو او مالدارۍ وزیر مولوي عطاالله عمري، چې د یو حکومتي پلاوي په ترکیب کې اوزبیکستان ته سفر کړی و، د تاشکند په ښار کې له صنعتي پارک څخه لیدنه وکړه.
دغه صنعتي پارک چې په ۱۰۰ هکتاره ځمکه کې جوړ شوی، په بېلابېلو برخو کې لکه د اوسپنې تولید، د سړو خونو جوړول، او د لمریزو تختو جوړولو په برخه کې فعالیت لري.
د دې لیدنې په ترڅ کې، د کانونو او پټرولیم وزیر ملا هدایتالله بدري او د ترانسپورت او ملکي هوایي چلند وزیر ملا حمیدالله اخوندزاده، د کرنې وزیر ملتیا کوله.
د کرنې وزیر له اوزبیکستاني پانګوالو وغوښتل، چې په خپلو تولیداتو کې د افغانستان له خامو موادو ګټه واخلي، چې په وینا یې افغانستان له بډایه طبیعي زېرمو څخه برخمن هېواد دی.