د صنعت او سوداګرۍ وزیر نورالدین عزیزي “د اسلامي نظام اقصادي مسولیتونه” تر سرلیک لاندې علمي سیمینار کې ګډون کړی.
نوموړي د دې سیمینار په ترڅ کې یې په اسلامي نظام کې د اقتصادي سکتور د مسولیتونو او د افغانستان د اسلامي امارت د سوداګرۍ وزارت د فعالیتونو او لاسته راوړنو په اړه معلومات وړاندې کړي.
د صنعت او سوداګرۍ وزیر په دې سیمینار کې د اسلامي نظام مسولیتونه په ګوته کړي او اقتصادي پرمختګ او د خلکو سوکالي او هوساینه یې په ټولنه کې د اسلامي نظام یو ستر مسولیت ګڼلی.
نورالدین عزیزي د خپلو خبرو په دوام د تشبثاتو سکتور د فعالیت پراختیا په موخه په بېلابېلو ولایتونو او په تېره په کابل کې د صنعتي پارکونو د جوړښت لپاره د ځمکو ځانګړي کول، له خصوصي سکتور او فعالیت څخه یې هر اړخیز ملاتړ، د مالیو د نه ورکړې د جریمو معاف کول، له داخلي تولیداتو څخه ملاتړ او ګټه اخیستنه، له داخلي تولیداتو سره د ورته وارداتي توکیو د تعرفې لوړول، له خصوصي سکتور څخه د ملاتړ صندوق جوړول، هېواد ته د بېرته راګرځیدونکو صنعتکارانو او سوداګرو لپاره د تشویقي امتیازونو ورکړه، د خامو موادو او ماشین آلاتو پر واردولو باندې د ترجیحي تعرفې وضعه کول، هېواد ته د بې کیفیته او غیر رسمي توکیو د وارداتو مخنیوی، د کورنیو تولیداتو د کچې لوړول او د لابراتوارونو جوړول یې پدې برخه کې د اسلامي امارت لاسته راوړنې ګڼلي دي.
د یادونې وړ ده، چې “د اسلامي نظام اقصادي مسولیتونه” تر سرلیک لاندې علمي او تحقیقیي سیمینار د افغانستان د علومو اکاډمۍ د ادارې له اړخه جوړ شوی و.