صنعت او سوداګرۍ وزارت د خصوصي سکټور او امارتي ادارو ترمنځ د خبرو اترو یو ورځینی کنفرانس جوړکړی و، چې موخه يې د اوسپنې پټلۍ له لارې د صادراتو زیاتوالی و.
دغه کنفرانس کې د صنعت او سوداګرۍ وزیر وویل؛ اوس مهال زموږ د صادراتو او وارداتو ترمنځ د بېلانس کچه لوړه ده، خو دوی هڅه کوي د اوسپنې پټلۍ له لارې د انتقالاتو دوه طرفه کولو سره د صادراتو او وارداتو بېلانس کچه راټیټه کړي.
د سوداګرۍ او پانګونې خونه بیا د اوسپنې پټلۍ له لارې سوداګري ارزانه او اسانه بولي او په سوداګرو او پانګوالو غږ کوي چې په دغه سکټور کې پانګونه وکړي.
د مالیې وزارت د ګمرکاتو رییس بیا سوداګرو ته ډاډ ورکوي، چې د هېواد په ګمرکونو کې اسانتیاوي زیاتې شوي او سوداګر کولی شي په ۲۴ ساعتونو کې خپل صادرات او واردات ترسره کړي.
د صنعت او سوداګرۍ وزارت په داسې وخت کې د اوسپنې پټلۍ له لارې د سوداګرۍ د پراخیتا کنفرانس جوړوي، چې افغانستان اوس مهال د حیرتان، اقینې، تورغونډې او هراتـخواف له لارې د سیمې او نړۍ سره سوداګري لري.