د اسلامي امارت ویاند مولوي ذبیح الله مجاهد وايي، اسلامي امارت د دوحې تړون ټولې مادې پلي کړي خو امریکا خپلې کړې ژمنې ماتې کړي او دغه تړون ته ژمنه نه ده پاتې شوې.
مولوي ذبیح مجاهد زیاتوي؛ د دوحې تړون نور پای ته رسیدلی او اسلامي امارت د دغه تړون له مخې نه بلکې د خپلې پالیسۍ له مخې حکومت پرمخ وړي.
د سیاسي چارو شنوونکي د امریکا او اسلامي امارت ترمنځ د دوحې هوکړه د اسلامي امارت لپاره لویه لاسته راوړنه بولي او وايي، د دې هوکړې له مخې په افغانستان کې امریکايي اشغال پای ته ورسېد او نوی حکومت رامنځته شو.
دوی هم امریکا دوحې تړون ته په نه ژمنتیا تورنوي.
پینځه کاله وړاندې د فبرورۍ په ۲۹ د امریکا او اسلامي امارت ترمنځ د قطر مرکز دوحه کې د افغان سولې تړون لاسلیک شو، چې د دغه تړون له مخې ټول امریکايي ځواکونه له افغانستانه ووتل او په دې هېواد کې د امریکا ۲۰ کلن اشغال پای ته ورسېد.