په ژنیو کې د ملګروملتونو د بشري حقونو شورا په ۵۸ مه غونډه کې د یو شمېر هېوادونو استازو په افغانستان کې د بشري حقونو وضعیت په اړه اندېښنه ښودلې او د میرمنو په وړاندې یې د محدویتونو د لرې کېدو غوښتنه کړې.
خو د امر بالمعروف، نهې عنالمنکر او شکایتونو اورېدلو وزارت دغه نیوکې او اندېښنې بې ځایه او د اسلامي امارت د اغېزمنو کړنو د ډب کولو هڅه بللې ده.
د امر بالمعروف نهی عن المنکر او شکایتونو اورېدلو وزارت ویاند مولوي سیف الاسلام خیبر ویلي، یو شمېر بنسټونه د ناسمو حقایقو او تورنو په پایله کې دا ډول څرګندونې کوي.
نوموړی زیاتوي، غربي هېوادونو د افغانستان د ۲۰ کلن اشغال پرمهال د میرمنو او بشري حقونو په نوم د فرهنګي اشغال ترڅنګ استخباراتي او سیاسي موخې پلې کولې.
د امر بالمعروف، نهې عنالمنکر او شکایتونو اورېدلو وزارت له دې وړاندې له یوناما څخه غوښتنه کړې وه، چې په خپلو راپورنو کې د افغانانو دیني ارزښتونه او کلتور په پام کې ونیسي او له بې ځايه او د حقیقت خلاف نیوکو څخه دې ډډه وکړي.