د ایران د دولتي خبري اژانس “ایرنا” د راپور له مخې، د ولسمشر مسعود پزشکيان ستراتېژیک مرستیال محمد جواد ظریف له خپلې دندې استعفا کړې ده.
د ښاغلي ظریف استعفا لیک ولسمشر ته رسېدلی، خو نوموړي یې تر اوسه په اړه کوم غبرګون نه دی ښودلی.
له دې وړاندې د ایران د اقتصاد وزیر ناصر همتي هم د پارلمان له لوري استیضاح او له دندې ګوښه شو.
د ښاغلي همتي د استیضاح لامل د تومان د ارزښت کمېدل او د بهرنیو اسعارو او په ځانګړي ډول د ډالر د بیې لوړوالی ښودل شوی دی.
جواد ظریف یو ځل پخوا د زمري پر ۲۱مه هم د مسعود پزشکیان د کابینې له جوړښت ناخوښي څرګنده کړې وه او له دندې یې استعفا کړې وه. هغهمهال د پزشکیان له مخالفت وروسته بېرته پخپله دنده پاتې شو.
ښاغلی ظریف د ایران د بهرنیو چارو وزیر هم پاتې شوی او یو له مهمو ډیپلوماټیکو اشخاصو ګڼل کېږي.