د رویټرز د راپور له مخې، د امریکا یو شمېر جمهوري غوښتنکو چې اوږده موده یې له اوکراین ملاتړ کاوه، د دواړو هېوادونو د ولسمشرانو له لفظي شخړې وروسته، د زیلینسکي پر وړاندې غبرګون ښودلی.
یاد مخکښ جمهوري غوښتونکي د اوکراین پر ولسمشر ولادیمیر زیلینسکي فشار راوړي، چې یا دې له روسیې سره د جګړې په اړه خپل دریځ بدل کړي او یا دې هم استعفا ورکړي.
د جمهوري غوښتونکو سناتور لیندزي ګراهام، چې د ټرمپ نږدې متحد شمېرل کېږي، ویلي: “هغه چې د سپینې ماڼۍ په بیضوي دفتر کې مې ولیدل، بې احترامي وه او نه پوهېږم چې بیا ځلې له زیلینسکي سره همکاري کولای شو که نه.”
ټرمپ او مرستیال یې جي ډي ونس هم زیلینسکي په “ناشکري” او “بېاحترامي” تورن کړی.
امریکا له هغه وروسته پر زلنسکي فشارونه زیات کړل، چې تېره اوونۍ یې له ټرمپ سره په سپینه ماڼۍ کې له ترینګلتیا ډکه ناسته درلوده.
له بلې خوا د اروپايي هېوادونو مشرانو په لندن کې د یوې غونډې پر مهال د زیلینسکي ملاتړ کړی او د برېتانیا لومړي وزیر له خپلو متحدینو غوښتي، چې د اوکراین د ملاتړ په موخه خپلې دفاعي ژمنې پیاوړې کړي.