پېښور کې د افغانستان اسلامي امارت د لويې قونسلګرۍ جنرال قونسل حافظ محبالله شاکر د خیبر پښتونخوا له وزیر اعلى علي امین ګنډاپور سره د افغانستان او خیبر پښتونخوا ترمنځ د همکارۍ مهمو برخو ته ودې ورکولو په پار لیدنه کړې.
په دې لیدنه کې د افغانستان او خیبر پښتونخوا تر منځ د دوه اړخیزې سوداګرۍ پر پراخوالي، د اقتصادي همکارۍ نوي لارې موندلو، او د دواړو خواوو لپاره د متقابلې ګټې فرصتونه رامنځته کولو موضوعاتو خبرې شوې دي.
همداراز د طورخم دروازې پر بیا پرانیستلو هم بحث شوی، تر څو سوداګري، د خلکو تر منځ اړیکې او عامو خلکو او سوداګرو ته د ورپېښو ستونزو د حل لپاره اسانتیاوې برابرې شي.
د دې ترڅنګ په خیبر پښتونخوا کې مېشتو افغان کډوالو ته د روغتیا او تعلیم کارتونه ورکولو یادونه شوې، تر څو هغوی د بنسټیزو روغتیایي او تعلیمي خدماتو څخه برخمن شي .
د خبرو پر دوام پر سیمه ییز ثبات او سولې ته وده ورکولو، د روانو ناامنیو لاملونه څېړل او ورته د حل لارو پر مندولو هم خبرې شوې دي
دا لیدنه د پاکستان او افغانستان د اړیکو د پیاوړتیا، پراخې همکارۍ او د سیمې د مهمو ستونزو د حل لپاره یو مهم ګام ګڼل کېږي .