تهران کې د اسلامي امارت سفیر مولوي فضل محمد حقاني د ایران د بهرنیو چارو وزارت د سویلي اسیا له رییس محمد رضا بهرامي سره لیدنه کړې.
ایران کې د افغانستان سفارت وایي، په دې لیدنه کې د دوه اړخیزو اړیکو د وروستیو پرمختګونو او ایران کې د مېشتو افغان کډوالو د مسایلو سربېره د ډیپلوماتیکو او اقتصادي اړیکو د پياوړتیا په تړاو خبرې شوې دي.
بلخوا په ایران کې مېشت یو شمیر افغانان وايي، دې هېواد کې د افغان کډوالود نیولو لړۍ روانه ده او په خبره یې اوس مهال د افغانانو پرمخ ټولې کارخونې تړل شوې او ورکړل شوې کارتونه هم باطل اعلان شوي دي.
د کډوالو چارو وزارت بیا وايي، د دغه وزارت په هڅو په ایران کې د قانوني کډوالو د نیولو لړۍ درېدلې خو په خبره یې د غیرقانوني کډوالو نیول لاهم دوام لري، چې د هغوی د ستونزو حل په موخه خبرې روانې دي.
د کډوالو د ثبت او د تثبیت کمېټه بیا وايي؛ په تېرو ۲۴ ساعتونو کې له ایرن څخه د نیمروز ولایت د ورېښمو پله له لارې ۴۱ کورنۍ راستنې شوي، چې ټوله شمېره یې ۱۴۹ تنه دي.