د راپورونو لهمخې، د جرمني په مانهایم ښار کې یوه کس د “کارنیوال” مراسمو پر مهال خپل موټر د خلکو پر یوه ډله وربرابر کړی، چې له امله یې دوه کسان وژل شوي او لږ تر لږه ۱۰ نور ټپیان دي.
جرمني رسنیو د یوه بل کس د وژل کېدو خبر هم ورکړی، خو پولیسو تر اوسه نه ده تایید کړې.
ځايي سرچینو ویلي، چې موټر په بازار کې په زیات سرعت سره د ګڼې ګوڼې په لوري په حرکت کې و.
د پولیسو په وینا؛ د دې پېښې په تړاو یې یو ۴۰ کلن جرمنی کس نیولی، چې د رواني ناروغۍ نښې لري.
تر اوسه نه ده روښانه شوې، چې دا پېښه قصدي شوې او که نه.
څو اونۍ وړاندې هم د جرمني په مونیخ ښار کې ورته پېښه شوې وه، چې له امله یې دوه کسان مړه او ۳۰ نور ټپيان شوي وو.