د اسرائیلي یرغلګرو پوځ اعلان کړی، چې پرون (چهارشنبه، دکب ۲۹مه) یې د غزې په مرکزي او جنوبي سیمو کې ځمکني پوځي عملیات بیا پیل کړي دي.
د الجزیرې د راپور له مخې، د اسرائیلي یرغلګرو په وروستیو بریدونو کې د ښځو او ماشومانو په ګډون لږ تر لږه ۷۱ فلسطینیان شهیدان شوي دي.
اسرائیلي رژیم له دې وړاندې د غزې پر بېلابېلو سیمو هوايي بریدونه پيل کړي وو. په دې بریدونو کې ۴۳۶ فلسطینیان شهیدان شوي، چې ۱۸۳ یې ماشومان دي.
حماس دا بریدونه له اوربند سرغړونه بللې او له منځګړو هېوادونو یې غوښتي، چې د دې یرغل د مخنیوي په اړه اقدام وکړي.
غزه کې د حماس غورځنګ او اسرائیلو تر منځه اوربند د جنوري پر ۱۹مه پیل شو، خو له پای ته رسېدو وروسته یې لا هم د دویم پړاو خبرې کومې پایلې ته نه دي رسېدلې.
د لومړي پړاو، چې ۴۲ ورځې یې دوام وکړ، له پای ته رسېدو وروسته اسرائیلي یرغلګرو غزې ته د بشري مرستو ټولې لارې بندې کړې او برېښنا یې هم پرې کړې ده. سربېره پر دې یې یو ځل بیا په غزه تړانګه کې هوايي او ځمکني بریدونه پيل کړي دي.