د اوبو او انرژي وزارت د سره صلیب نړیوالې کمیټې هغه راپور رد کړی، چې پکې ويلي یې دي، په افغانستان کې ۳۳ ملییونه وګړي د څکلو پاکو اوبه ته لاس رسی نه لري.
د سره صلیب نړیوالې کمېټې د اوبو د نړیوالې ورځې په مناسب په خپل پیغام کې ویلي، چې په افغانستان کې ۳۳ میلیونه وګړي د اوبو له کمښت سره مخ دي.
د اوبو او انرژي وزارت بیا د سره صلیب نړيوالې کمېټې دا راپور بې بنسټه بولي او وايي، چې تېرکال يې له وچکالۍ سره د مبارزې په برخه کې لويې پروژې پلې کړې؛ د ۸ لویو بندونو چارې یې پيل کړې او په ټول هېواد کې یې ۴۰۰ چکډېمونه جوړ کړي دي.
د اوبو او انرژي وزارت ویاند قاري مطیع الله عابد وايي، چې په ښارونو کې یې هم د اوبو د کمښت ستونزې ته جدي پاملرنه کړې ده او د کابل د اوبو کمښت ستونزې د له منځه وړلو په موخه به ډېر ژر د پنجشیر سیند د اوبو رالېږد پروژې چارې پیل شي.
د افغانستان اسلامي امارت په تېرو څه کم څلورو کلونو کې د اوبو مهارولو لپاره کوټلي ګامونه اخیستې، چې له جملې یې په شمال کې د قوشتیپې کانال پیل او د کمال خان او شاه و عروس بندونو چارې بشپړې شوې دي.