د قدس خبري شبکې راپور ورکړی، چې اسرائیلي یرغلګرو د حماس اسلامي غورځنګ د سیاسي دفتر یو لوړ پوړی غړی صلاح البردویل او مېرمن یې د غزې په جنوب خان یونس کې شهیدان کړي دي.
صهیونیستي رژیم د غزې پر بېلابېلو سیمو یو ځل بیا درنې او بېامانه بمبارۍ پیل کړې او یوازې پرون شنبه په دې بریدونو کې ۳۴ فلسطینیان شهیدان شوي دي.
د فلسطین سرې میاشتې ټولنه وايي، چې اسرائیلي یرغلګرو د رفح په سویل کې د دوی امبولانسونه هم کلابند کړي او له ګڼو روغتیايي کارکوونکو سره یې اړیکه پرې شوې ده.
یادې ټولنې پر اېکس پاڼه لیکلي، چې یو شمېر طبي کارکوونکي ټپيان شوي هم دي، له نورو کارکوونکو سره اړیکه پرې ده او له څو ساعتونو راهیسې کلابند دي.
د غزې روغتیا وزارت وايي، چې د اسرائیلي یرغلګرو د بریدونو له پيل راهیسې ۴۹ زره او ۷۴۷ فلسطینیان شهیدان او ۱۱۳ زره او ۲۱۳ نور ټپیان شوي دي.