العربیه خبري شبکې د خپلو سرچینو له قوله راپور ورکړی، چې د سوریې انتقالي حکومت ولسمشر احمد الشرع په رسمي توګه د روسیې له ولسمشر ولادیمیر پوتین څخه غوښتي، چې بشارالاسد د محاکمې لپاره دمشق ته وسپاري.
له دې وړاندې رویټرز راپور ورکړی و، چې الشرع له روسیې غوښتي، تر څو هغه شتمنۍ بېرته ورکړي چې بشارالاسد روسیې ته د تګ نه مخکې مسکو ته انتقال کړې وې.
څه موده وړاندې د سلواغې پر ۲۴مه د روسیې د دولتي خبري اژانس “ټاس” راپور ورکړی و، چې د روسیې ولسمشر ولادیمیر پوتین (چهارشنبه، د سلواغې۲۴مه) د سوریې د انتقالي حکومت له مشر احمد الشرع سره د سوریې د اوسني وضعیت په اړه تلیفوني خبرې کړې دې.
ولادیمیر پوتین ټینګار کړی و، چې روسیه د “سوریې د دولت یووالي، حاکمیت او ځمکنۍ بشپړتیا” د اصل ملاتړ ته ژمنه ده او د دمشق د ټولنیز او اقتصادي وضعیت د ښهوالي لپاره یې د خپلو مرستو د دوام ډاډ ورکړی و.
احمد الشرع د روان زېږدیز کال د جولای میاشتې په پای کې په رسمي ډول د سوریې د انتقالي دولت د مشر په توګه وټاکل شو.
هیت تحریر الشام د احمد الشرع په مشري د ۲۰۲۴ کال ډسمبر میاشتې پر ۸مه د سوریې پلازمېنه دمشق ونیو او د اسد رژیم ته یې د پای ټکی کېښود.