د غور ولايت د اطلاعاتو او کلتور رياست مسولین وايي، د منار جام د ساتنې او استحکام چارې، چې څه موده وړاندې پيل شوې وې، پای ته ورسېدې.
یاده پروژه د اطلاعاتو او کلتور د ریيس مولوي عبدالحی زعيم د ولايت مقام د استازي او سکتوري ادارو د مسولينو له لوري ګټې اخستنې ته سپارل شوې ده.
د اطلاعاتو او کلتور ریيس ویلي، چې له موسمي سېلابونو او سيند څخه د ورپېښو خطرونو څخه د ژغورنې په موخه د منار جام شاوخوا د ګبين کارۍ چارې بشپړې شوې. دا پروژه د اسيا د پراختيايي ټولنې له لوري د ۲ میلیونه او ۲۴۰ زره افغانیو په لګښت د اطلاعاتو او کلتور وزارت سره په همږغۍ د ۲۶۷ متره اوږدوالي، يو نیم متر عرض او يو متر جګوالي سره پيل شوې وې، چې د جوړ شوي ګبین د شاته برخو په ډکولو سره پای ته ورسېده.
د یادونې وړ ده، چې د افغانستان اسلامي امارت له بیا حاکمیت وروسته د غور ولایت د تاریخي ابداتو په ځانګړي ډول منار تاریخي جام د ساتنې په برخه کې بېلابېلې پروژې پلې کړې دي.