د کلیو بیارغونې او پراختیا وزارت له لوري د پکتیا په زرمت ولسوالۍ کې د شاوخوا ۲۳۶ میلیونه افغانیو په لګښت د ۱۶۹ پراختیايي پروژو چارې پيل شوې.
په دې تړاو جوړو شویو مراسمو کې د کلیو بیا رغونې او پراختیا وزیر ملا محمد یونس اخندزاده، مل پلاوي، د پکتیا والي مهرالله حماد او د یاد ولایت د کلیو بیارغونې او پراختیا رییس مولوي مرزا جان صادق، یو شمیر نورو مسولینو، د یادې ولسوالۍ علماء کرامو، سپین ږیرو او ځواناو ګډون کړی و.
په یاده غونډه کې ملا محمد یونس اخندزاده ویلي، چې دا نظام په ډیرو لویو قربانیو راغلی او موږ او تاسې یې باید قدر وکړو او شکرانه یې ادا کړو.
نوموړي زیاته کړې، چې د کلیو بیارغونې او پراختیا وزارت د متوازن انکشاف لپاره ژمن دی او د خپلو امکاناتو په پام کې نیولو سره یې د پروژو تطبیق د هېواد لېرو پرتو سیمو ته جاري ساتلی دي.
په دغو پروژو کې د کلیوالي سړکونو، پلونو، پلچکونو، استنادي دیوالونو او کانالونو جوړول شامل دي.
د یادو پروژو د کار په جریان کې به سلګونه کاریګرو ته د کار زمینه برابره او په بشپړیدو سره به يې په اړوندو برخو کې د یادې ولسوالۍ د اوسیدونکو ستونزې له منځه ولاړې شي.