د احصايې او معلوماتو ملي اداره وايي؛ د بادغیس ولايت د احصايې او معلوماتو ریاست په ۱۴۰۳ کال کې ۱۰۰ زره او ۱۵۶ کسانو ته د نفوسو د احوالو ثبت اړوند خدمتونه وړاندې کړي دي.
یاده اداره زیاتوي؛ په دې خدمتونو کې ۳۳ زره او ۳۰۴ برېښنایي پېژندپاڼې، ۵۲ زره او ۷۱۹ کاغذي پېژندپاڼې ، څلور زره او ۹۹۹ زېږون کارتونه، ۷۴۶ د مړینې پارچې او اته زره او ۳۸۸ کسانو ته د تابعیت پېژندپاڼو اصلاحي خدمتونه شامل دي.
د بادغیس ولايت د احصايې او معلوماتو رییس ملاضیاء الدین بختیار ویلي؛ په دې ولایت کې د برېښنایي پېژندپاڼو دوې وېش څانګې فعالې دي، چې د نویو برېښنایي پېژندپاڼو پر وېش سربېره له وېش وروسته خدمتونه (مثنی پېژندپاڼه، د انځور بدلول، د کارت پر مخ اصلاحات او د زېږونونو ثبت) هم هره ورځ نارینه او ښځینه غوښتونکو ته وړاندې کوي.
له بل لوري یاد ریاست په تېر ۱۴۰۳ کال کې په احصاييوي برخه کې د ۳۸۱ معیاري فورمو له لارې اقتصادي او ټولنیز ارقام او معلومات راټول او له ادارې سره شریک کړي دي.همدارنګه یې د ۲۹۰ قلمه خوراکي او غیر خوراکي توکو بیې په میاشتني ډول له بازار را ټولې کړي دي.