د بهرنیو چارو وزیر مولوي امیرخان متقي او د پاکستان د لومړي وزیر مرستیال او د بهرنيو چارو وزیر محمد اسحاق ډار ټلیفوني خبرې کړي دي.
په دې ټلیفوني مکالمه کې محمد اسحاق ډار کابل ته د سفر په جریان کي د ښې میلمه پالني له امله مننه کړې او ټينګار يې کړی، چې کابل کې د شوو ژمنو د پلي کېدو لپاره به هڅې کوي او په ځانګړي ډول د کډوالو د ستونزو په حل کولو او شکایتونو د اوریدلو لپاره به جدي اقدامات کوي.
په دې مکالمه کې ښاغلي محمد اسحاق ډار د پاکستان د کورنيو چارو وزارت لخوا د کنترولخونې د رامنځته کېدو او د کډوالو د شکايتونو اورېدو په موخه د مرستې د تلیفوني شمېرو د خپرولو خبر هم ورکړی.
مولوي امیرخان متقي هم کابل ته د خپل پاکستاني سيال سفر د ستونزو د حل په لور یو مثبت ګام بللی او د شوو پرېکړو د پلي کولو، په ځانګړي توګه هېواد ته د راستنېدونکو افغان کډالو ستونزو ته د رسېدو په موخه په مرکزي کچه د کنترولخونې او د مرستې د اړيکو شمېرو د فعالولو اقدامات ستایلي دي.