د برېښنا شرکت له لوري تورخم عمري پنډغالي کې د څه باندې پینځه میلیونه افغانیو په مالي لګښت د ۱.۵ میګاواټو په ظرفیت برېښنا شبکه فعاله او ګټې اخیستنې ته وسپارل شوه، چې له دې سره ټول کمپ روښانه او راستنې شوې کورنۍ له برېښنا څخه برخمنې شوې.
د دې برېښنا شبکې د پرانیستې په مراسمو کې د ننګرهار مرستیال والي مولوي عزیزالله مصطفی، د هېواد د برېښنا شرکت عمومي رییس ډاکټر عبدالباري عمر، د پېښو پر وړاندې د مبارزې ملي ادارې عمومي رییس ملا نورالدین ترابي، د امارتي شرکتونو عمومي رییس مولوي احمد جان، د چارو ادارې، بهرنیو چارو وزارت استازو، د عمري کمپ مسول محمد هاشم میوندوال او یو شمېر نورو چارواکو ګډون کړی و.
ډاکټر عبدالباري عمر د یادې شبکې د پرانیستې په مراسمو کې ویلي، دا شبکه کولی شي کمپ کې ټولو خیمو ته برېښنا ورسوي او د اړتیا په صورت کې به ۲۴ ساعته برېښنا چمتو کړي.
نوموړي زیاته کړې، دا د اسلامي امارت ژمنه ده چې خپلو خلکو ته بنسټیز خدمتونه وړاندې کوي.
په ورته مهال ملا نورالدین ترابي، د ننګرهار مرستیال والي مولوي عزیزالله مصطفی، د بهرنیو چارو وزارت استازي او د عمري کمپ مسول هم د برېښنا شرکت له همکارۍ مننه کړې او ویلي یې دي، اسلامي امارت خپلو راستنېدونکو افغانانو ته د ژوندانه په ټولو برخو کې لازمې اسانتیاوې برابروي.
د یادونې وړ ده، چې تر دې وړاندې هم د تورخم په عمري کمپ کې یو شمېر بنسټیز خدمتونه برابر شوي او د مسولینو په وینا دا لړۍ به لا نوره هم پراخه شي.