د غزې د دولتي رسنیو دفتر وايي، چې د اسرائیلي یرغلګرو د بریدونو له ۶۵ سلنه ډېر قربانیان ښځې، ماشومان او سپينږیري دي.
یاد دفتر زیاته کړې، چې د اسرائیلو په بریدونو کې د ۵۲ زره او ۲۴۳ شهیدانو له ۶۵ سلنه ډېره برخه ښځې، ماشومان او سپينږیري دي. له ۱۸ زره ډېر ماشومان شهیدان او له ۱۲ زره او ۴۰۰ ډېرې ښځې شهیدانې شوې دي.
د غزې د دولتي رسنیو د راپور له مخې، اسرائیلي عسکرو له دوه زره او ۱۸۰ ډېرې فلسطیني کورنۍ -چې مور، پلار او ټوله کورنۍ یې شهیدان شوي- له منځه وړې او له ۵ زره او ۷۰ ډېرې کورنۍ یې په داسې ډول له منځه وړې، چې په هره کورنۍ کې یوازې یو کس ژوندی پاتې دی.
دغهراز د صهیونیستي یرغلګرو په بریدونو کې له ۱۴۰۰ ډېرو ډاکټرانو او روغتیايي کارکوونکو، ۱۱۳ د ملکي دفاع کارکوونکو او ۲۱۲ ژورنالیستانو او د رسنیو کارکوونکو ژوند بایللی دی.
سربېره پر دې په دې بریدونو کې له ۷۵۰ ډېر د بشري مرستو ساتونکو افسرانو هم ژوند بایللی دی.