د کلیو د بیارغونې او پراختیا وزارت له لوري د ننګرهار ولایت د تورخم سیمې په عمري مېشت غالي کې د شاوخوا ۱۱ میلیونه افغانیو په لګښت د اوبو رسولو یوې شبکې د جوړولو چارې د یو لړ مراسمو په ترڅ کې پیل شوې.
د دې شبکې د چارو د پیل په مراسمو کې د کلیو د بیارغونې او پراختیا وزیر ملا محمد یونس اخوندزاده، مل پلاوي، د ننګرهار ولایت د کلیو د بیارغونې او پراختیا ریيس مولوي قسمت الله مبارز، د عمرې مېشت غالي مسول محمد هاشم میوندوال او د کډوالو د کمېټې یو شمیر غړو ګډون کړی وو.
په یاده شبکه کې د ۱۰۰ مترو په ژوروالي د یوې څاه کیندل، د زر متر مکعب په وړتیا د پاکو اوبو دوو ذخیرو جوړول، د څلور زره مترو په اوږدوالي پایپ غځول، د ۲۸ سولر تختو او شیردهنونو نښلول شامل دي.
د دې شبکې د کار په جریان کې به لسګونو هېوادوالو ته د کار زمینه برابره او په بشپړیدو سره به يې د یاد مېشت غالي ۱۰۰ زره تنه کډوال د څښاک پاکو اوبو ته لاسرسی پيدا کړي.