د کابل پوهنې ریاست له ګاونډیو هېوادونو څخه د را ستنو شویو زدهکونکو د تعلیمي سویې د تثبیت ازموینه واخیسته.
د پوهنې وزیر مولوي حبیب الله اغا د دې ازموینې له جریان څخه لیدنه کړې او د بشپړې روڼتیا ډاډ یې ورکړی.
نوموړي ویلي، پوهنې وزارت هڅه کوي، چې د هېواد په ټولو سیمو کې د هېوادوالو لپاره روزنیزې اسانیتاوې چمتو او تعلیمي خدمات وړاندې کړي.
د کابل د پوهنې رییس مولوي عبدالباسط ویلي، په دې ازموینه کې ۲۷۰ نارینه زدهکونکو ګډون کړی، چې د سویې له تثبیت او درسي ټولګي له مشخص کېدو وروسته به له خپلو کورنو سره په نږدې ښوونځیو کې د زدهکړو د دوام لپاره جذب شي.
په یاده ازموینه کې شامل زدهکوونکي خوښ دي، چې د پوهنې وزارت له لوري د ښوونې او روزنې زمینه ورته برابره شوې ده.
د کابل د پوهنې ریاست وايي، چې د سویې د تثبیت ازموینې په دوو پړاوونو کې څه باندې ۶۰۰ راستانه شوي هېوادوال بېلابېلو ښوونځیو او مدرسو ته معرفي شوي او دا پروسه لا هم دوام لري.