د کلیو د بیارغونې او پراختیا وزارت د روان کال په اوږدو کې په یو شمېر ولایتونو کې د پراختیایي پروژو د عملي کار د پیل خبر ورکوي.
د دې وزارت د ویاند ملا نورالهادی عادل وايي، د دغو پروژو د پلي کېدو ارزښت له ۵۵۰ میلیونه افغانیو څخه زیات دی او اوس هم په بېلابېلو ولایتونو کې يي چارې دوام لري.
د کلیو بیارغونې او پراختیا وزارت ویاند په وینا؛ چې دا عام المنفعه پروژې په زابل، غزني، کاپیسا او یو شمېر نورو ولایتونو کې د پلي کېدو په حال کې دي.
په ورته مهال، یو شمېر هېوادوال د دې پراختیایي پروژو د پیل هرکلی کوي او وایي، چې له بشپړیدو سره به یې د دوی د ورځنیو ستونزو یوه برخه حل شي.
د یادونې وړ ده، چې د کلیو د بیارغونې او پراختیا وزارت تېر کال هم په بېلابېلو ولایتونو کې ګڼې پروژې پلي کړې وې.