د ریاستالوزرا اقتصادي مرستیال ملا عبدالغني برادر اخوند د روان ۱۴۰۴ کال د ثور میاشتې په ۱۶مه نېټه د افغانستان لپاره د متحده عربي اماراتو له ځانګړي استازي سیف محمد الکتبي سره پخپل کاري دفتر کې لیدنه کړې.
د دې لیدنې پر مهال د ټولګټو وزیر ملا محمد عیسی ثاني هم حضور درلود.
په ناسته کې دواړو لوریو د افغانستان او متحده عربي اماراتو ترمنځ د دوه اړخیزو په ځانګړي ډول اقتصادي اړیکو د پراختیا په اړه خبرې کړې.
د ریاستالوزرا اقتصادي مرستیال ویلي، افغانستان له طبیعي سرچینو غني هېواد دی او اسلامي امارت هڅه کوي، چې په دې زېرمو کې پانګونه جذب او پر مټ یې هېواد پر ځان بسیا کړي.
نوموړي زیاته کړې، چې د متحده عربي اماراتو پانګوال په افغانستان کې په بېلابېلو برخو کې پانګونه کولای شي.
د افغانستان لپاره د متحده عربي اماراتو ځانګړي استازي ویلي، چې غواړي په کابل کې د متحده عربي اماراتو د پانګوالو او سوداګرو کنفرانس جوړ کړي.
په دې کنفرانس کې به د افغانستان لپاره پر هغو پروژو خبرې وشي، چې پر مټ به یې په افغانستان کې اقتصادي پرمختګ رامنځته شي.
دغه راز نوموړي په افغانستان کې د اوسپنې پټلۍ او د سړکونو جوړولو په برخه کې پانګونې ته د خپل هېواد لېوالتیا ښودلې ده.