د مخابراتو او معلوماتي ټکنالوژۍ وزیر مولوي نجیب الله حیات حقاني د ام سي سي چینايي شرکت له لوی رییس وانګ جي چینګ او مل پلاوي سره لیدنه او د مخابراتي خدمتونو، ټکنالوژۍ او مصنوعي ځیرکتیا اړوند خبرې کړې دي.
په دې ناسته کې د مخابراتو او معلوماتي ټکنالوژۍ وزیر د ام سي سي چینايي شرکت لوی رییس ته د ښه راغلاست تر څنګ هېواد کې د ټکنالوژۍ په برخه کې د شته فرصتونو معلومات وړاندې کړي او ویلي یې دي، چې د مخابراتو او معلوماتي ټکنالوژۍ وزارت هڅه کوي هېواد کې د ټکنالوژۍ د ودې او پرمختګ په برخه کې د سیمې او ګاونډیو هېوادونو سره په همکارۍ خپل پرمختګ چټک کړي.
نوموړي زیاته کړې، چې په اوس وخت کې د نړۍ په هره برخه کې د ټکنالوژۍ د پرمختګ له مخې د مصنوعي ځیرکتیا وده چټکه شوې او د سالمې استفادې په صورت کې د چارو د اسانتیاو لپاره ترې په لوړه کچه ګټه اخیستل کېږي.
د ام سي سي چینايي شرکت لوی رییس وانګ جي ویلي، چې اوس مهال یاد شرکت د لوګر ولایت محمداغې ولسوالۍ مس عینک سیمه کې د نړۍ د سترې پروژې د مسو د کان قرارداد له ځانه سره لري او هیله یې ښودلې، چې په یاده سیمه کې غوره مخابراتي چوپړ په موخه ورته اسانتیاوې برابرې شي.
نوموړي همدا راز یادونه کړې، چې د یاد کان د چارو ښه مدیریت لپاره یې افغان کادرونه د ټکنالوژۍ په برخه کې چین هېواد ته استولي، چې د مصنوعي ځیرکتیا د زده کړې سربیره به د کان کیندنې د چارو مدیریت او پرمختګ هم ورسره چټک شي.
په پای کې د مخابراتو وزیر د لوګر ولایت محمداغې ولسوالۍ د مس عینک سیمه کې د یاد شرکت د مخابراتي ستونزو د حل په موخه ډاډ ورکړی.
مولوي نجیب الله حیات حقاني ټینګار کړی، چې هېواد کې د افغان کادرونو د ظرفیت لوړونې په موخه او په ځانګړي ډول اوس مهال له مصنوعي ځیرکتیا څخه د استفادې په دور کې د ظرفیت جوړونې او اسانتیاوو د راوستو په موخه پوره هلې ځلې کوي.