د سوداګریزو اړیکو د پیاوړتیا، د پانګونې جذب او د سیمهییزو ګډو پروژو پلي کولو په موخه د افغانستان، پاکستان او چین ترمنځ ګډه درې اړخیزه غونډه وشوه.
په دې غونډه کې د صنعت او سوداګرۍ وزیر نورالدین عزیزي او د هېواد سوداګرو، د محمد صادق خان په مشرۍ پاکستاني او د یوشیاو یونګ په مشرۍ چینايي استازو ګډون کړی و.
د صنعت او سوداګرۍ وزارت وايي، غونډه کې په افغانستان کې د ګډو صنعتي پارکونو په جوړولو، د ځانګړو اقتصادي زونونو په رامنځته کولو، د صادراتو پروسس لپاره د مرکزونو په جوړولو، د درېیو هېوادونو ترمنځ د نندارتونونو په جوړولو، افغانستان کې د کوچنیو او منځنیو تشبثاتو د ملاتړ مرکزونو د جوړولو سربېره د درېیو هېوادونو ترمنځ د بانکي اسانتیاوو په رامنځته کولو او په نورو بېلابېلو موضوعاتو خبرې شوې دي.
نورالدین عزیزي د غونډې د ګډونوالو له ګډې همکارۍ مننه کړې او ویلي یې دي، اسلامي امارت د اقتصاد محوره پالیسۍ په درلودلو سره د بهرنیو پانګوالو جذب او دوه اړخیزو ګټو ته ژمن دی.
نوموړي همداراز د چین او پاکستان د سوداګرۍ وزیرانو ته بلنه ورکړې ده.