د سرحدونو، قومونو او قبایلو چارو وزارت د جرګو او قبایلو چارو د همغږۍ مرستیال مولوي محمد علي جان احمد د ماشومانو د ملاتړ موسسې له مرستیال سید محمد پاچا او د اړیکو موسسې له مسول احمد رحیم خوستي سره د همکارۍ هوکړې وکړې.
د یادو هوکړو له مخې د هېواد په بېلابېلو سیمو کې به د روغتیا، کرنې، غذایي خوندیتوب، څښاک اوبو او د بې سرپناه ماشومانو د ساتنې په برخو کې پراختیایي پروژې پلي شي.
په دې اړه جوړې شوې غونډه کې د جرګو او قبایلو چارو د همغږۍ مرستیال ټینګار وکړ، چې اړوندې موسسې دې د خلکو ستونزې را ټولې او د اړتیاوو پر بنسټ دې خدمات ورته وړاندې کړي.
همدا راز د یادو موسسو مسولینو د خپلو کاري کړنو په اړه د غونډې له ګډونوالو سره هر اړخیز معلومات شریک کړل او ژمنه یې وکړه، چې په اړینو برخو کې به ډېر ژر خلکو ته د خدماتو د رسولو په برخه کې د هېواد په مرکزي او سرحدي ولایتونو کې ګډ فعالیت پیل کړي.