د ایران بهرنیو چارو وزارت د یوې اعلامیې په خپرولو سره د دې هېواد په تړاو د امریکا د ولسمشر ډونالډ ټرمپ وروستۍ څرګندونې تفرقه اچوونکې او ګمراه کوونکې بللې او غندلي یې دي.
د یاد وزارت په اعلامیه کې راغلي: “د حقیقت دغه ډول تحریف په غزه کې د نسل وژنې او لبنان، سوریه او یمن کې د صهیونیستي رژیم د نورو جنایتونو د پټولو لپاره کېږي.”
د ایران د اسلامي شورا د مجلس مشر محمد باقر قالیباف هم د یادو څرګندونو په غبرګون کې ویلي، چې په نظر یې ټرمپ په بېځایه اندېښنه کې ژوند کوي.
نوموړي زیاته کړې، چې ایران جګړه پال نه دی، خو د زور پر وړاندې سر نه ټیټوي او دا مو ثابته کړې هم ده.
ښاغلي قالیباف ټینګار کړی، چې موږ له خپلو ګاونډیانو سره وروري کوو او د امریکا له لوري د اختلاف له رامنځته کولو سره خلاف یو. زموږ د سیمې امنیت به د همدې سیمې د هېوادونو په همکارۍ د نورو هېوادونو له لاسوهنې پرته تامینېږي.