د امریکا ولسمشر ډونالډ ټرمپ د قطر د امیر په کوربهتوب د یوې رسمي ماښامنۍ پر مهال له ایران سره د امریکا د اړیکو په تړاو څرګندونې کړې دي.
ټرمپ ویلي، چې د حکومت چلند يې له تهران سره د کړکېچونو د سولهییز حل پر بنسټ ولاړ دی او غواړي د ایران پرمختګ وویني.
دغه راز نوموړي د کړکېچونو په کمولو کې د قطر د چارواکو هڅې ستایلې او زیاته کړې یې ده، چې دا هېواد له امریکا سره د ایران د اټومي هوکړې په برخه کې همکاري کوي.
د امریکا ولسمشر ډونلډ ټرمپ منځني ختیځ ته د سفر په ترڅ کې قطر ته رسېدلی او د دې هېواد له مشرانو سره یې لیدنې کړې دي.
ټرمپ پرون چهارشنبه په سعودي عربستان کې د سوریې د لنډمهاله دورې له ولسمشر احمدالشرع سره هم لیدنه وکړه او د خلیج د همکاریو شورا په ناسته کې یې وینا وکړه.
وروسته یې دوحې ته سفر وکړ او د قطر له امیر تمیم بن حماد ال ثاني سره یې په لیدنه کې یو شمېر هوکړې هم لاسلیک کړې.