د امریکا ولسمشر ډونالډ ټرمپ په دوحه کې د یوې ناستې پر مهال د قطر له امیر شیخ تمیم بن حمد ال ثاني سره د دواړو هېوادونو تر منځ د دفاعي او سوداګریز اړیکو د پیاوړتیا تړونونه لاسلیک کړي دي.
ټرمپ ویلي، چې د قطر ایر ویز هوایي شرکت د امریکا د الوتکو له تولیدي شرکت بوینګ سره د ۲۰۰ میلیارده ډالرو په ارزښت د الوتکو د پېرلو تړون هم لاسلیک کړی دی.
په دې تړون کې د ۱۶۰ الوتکو د پېرلو هوکړه شوې، چې لګښت یې له ۲۰۰ میلیارده ډالرو زیات دی او دا د بوینګ شرکت په تاریخ کې تر ټولو ستر تړون ګڼل شوی دی.
د قطر امیر ویلي، چې د دې تړونونو له لاسلیک وروسته دواړه هېوادونه د اړیکو بل پړاو ته داخلیږي.
ورته مهال ټرامپ هم د قطر له امیر سره د روسیې او اوکراین د جګړې او د ایران او سوداګریزو اړیکو په تړاو خبرې اترې “په زړه پورې” بللې دي.