د بنګله دېش مرکز الاسلام بنسټ له افغاني سرې میاشتې ټولنې سره په همکارۍ کابل کې د هغو ماشومانو وړیا درملنه کوي، چې د شونډو او تالو چاود پر ناروغۍ اخته دي.
د یادې ټولنې مسولین وايي، تر دې وړاندې هم دې بنسټ له لوري پر یادې ناروغۍ د اخته کسانو درملنه په سمه توګه ترسره شوې ده.
د بنګله دېش مرکز الاسلام بنسټ مشر حمزه شهید الاسلام وایي، موخه مو د اسلامي ورورولۍ له مخې د هغو بې وزله ماشومانو درملنه ده، چې د شونډو او تالو چاود پر ناروغۍ اخته دي.
نوموړی زیاتوي؛ د اسلامي وروګلوۍ له مخې د یادو ناروغانو درملنه پر موږ حق ده.
ورته مهال په دې ناروغۍ د اخته کسانو کورنۍ چې په خصوصي روغتونونو کې یې د درملنې توان نه درلود، خوښ دي چې وړیا درملنه یې کېږي.
د افغاني سرې میاشتې ټولنې مسولینو په وینا، د بنګله دېش مرکز الاسلام بنسټ له لوري راغلي ډاکټران به په اته ورځو کې د شاوخوا ۱۲۰ ناروغانو درملنه وکړي.