د چاپېریال ساتنې ملي اداره وایي، چې د “نوسکي ۱۱م نړیوال چاپېریالي کانګرس” د دې ادارې د عمومي رییس مولوي مطیعالحق خالص په مشرۍ د افغان پلاوي په شتون کې پیل شو.
دغه نړیوال چاپېریالي کانګرس د بېلابېلو هېوادونو د استازو، نړیوالو بنسټونو، د چاپېریال متخصصینو او فعالانو او اکاډمیکو ادارو په ګډون روسیه کې پيل شوی، چې د خوړو خوندیتوب، دوران اقتصادي سیستم، د چاپېریال سره د سازګاره ټکنالوژیو د انتقال، د کاربن کمښت، د شنه اقتصاد پراختیا، په چاپېریالي پروګرامونو کې د ځوانانو د شاملولو، د بریکس هېوادونو د دوامداره پرمختګ، ایکوتوریزم ته د ودې ورکولو او یو شمېر نورو موضوعاتو په تړاو به پکې خبرې وشي.
د چاپېریال ساتنې ملي اداره زیاتوي، چې افغان پلاوی به د دې ناستې په څنډه کې د چاپېریال ساتنې د دوامدار پرمختګ په برخه کې د سیمهییزې او نړیوالې همکارۍ د پیاوړتیا په موخه د بېلابېلو هېوادونو له استازو سره دوهاړخیزې او څو اړخیزې ناستې هم وکړي.