د کانونو او صنایع خونه وایي، د صنعت اونۍ نندارتون کې ۱۳۸ سکټورونو خپل تولیدات نندارې ته وړاندې کړي و، چې د یو زر او ۵۰۰ بهرنیو پانګوالو په ګډون ۵۰۰ زره خلکو لیدنه ترې کړې ده.
پر دې سربېره په دې نندارتون کې د ۷ میلیونه ډالرو په ارزښت تړونونه لاسلیک شوي او د یو میلیون ډالرو په ارزښت پېر او پلور پکې شوی دی.
هممهاله افغان پانګوال او صنعتکاران له خلکو غواړي، چې د بهرنیو تولیداتو پر ځای دې له کورنیو تولیداتو ګټه واخلي، تر څو د هېواد اقتصاد پخپلو پښو ودرېږي.
د اسلامي امارت مسولین وايي، د صنعت اونۍ ملي نندارتون په ډاګه کړه، چې افغانستان اوس د کورنیو تولیداتو له پلوه په زیاتو سکټورونو کې پر ځان بسیا شوی او له وارداتي هېواد څخه پر صادراتي هغه بدلېدای شي.
د صنعت اونۍ څلورم ملي نندارتون، چې د روانې غبرګولي میاشتې په شپږمه نېټه د ۶۰۰ کورنیو شرکتونو په ګډون پیل شوی و، پرون یکشنبه پای ته ورسېد.