د کور او ښار جوړولو وزیر مولوي حمدالله نعماني پخپل کاري دفتر کې د ترکيې د اېلکېپای (ILKYPI) ساختماني شرکت له رییس عبدالله شورش سره کتلي.
مولوي حمدالله نعماني د یاد شرکت مسولینو ته د ښه راغلاست ترڅنګ په افغانستان کې د ساختماني چارو پر کیفیت او سټنډرډونو خبرې کړې او د ښاري پراختیا، پانګونې او بنسټیزو ودانیزو چارو پروژو په اړه یې معلومات وړاندې کړي دي.
د یاد ترکي شرکت رییس ویلي، چې په صنعتي تاسیساتو، مسکوني او سوداګریزو پروژو، تعلیمي او تحصیلي پروژو، مسجدونو، فولادي ساختمانونو او نورو اړینو برخو کې د پام وړ تجربه لري.
نوموړي زیاته کړې، غواړي افغانستان کې د ځینو پروژو تړونونه تر لاسه او پانګونه وکړي.
د کور او ښار جوړولو وزیر د وزارت د مسلکي ټیم په ملتیا دوی ته لارښوونه کړې، تر څو د کابل ښار په مکروریانو، خوشحال خان مېنه او نیله باغ سیمو کې موجوده سیمې وګوري او ارزونه یې وکړي.
د ښاغلي نعماني په خبره، اوسمهال په دې سیمو کې د سوداګریزو مارکېټونو او عصري استوګنیزو کورونو د جوړولو طرحې تر غور لاندې دي.
مولوي حمدالله نعماني ټینګار کړی، چې د ښاري پراختیا انډولیزې پراختیا او جوړښت ته ژمن دي او هڅه کوي، چې له ملي او نړیوالو پانګهوالو سره د متقابل باور پر بنسټ تلپاتې او پرمختللې همکارۍ او اړیکې ولري.
د غونډې په پای کې دواړو لوریو د ګډو همکاريو د دوام او مشخصو طرحو د ترتیب ژمنه کړې ده.