د رياست الوزرا اداري مرستيال مولوي عبدالسلام حنفي فاریاب ولایت ته د سفر په لړ کې د یاد ولایت له یو شمېر سوداګرو او پانګوالو سره لیدنه کړې.

په دې لیدنه کې چې د کرنې، اوبولګولو او مالداري وزیر مولوی عطاءالله عمري، د فاریاب والي مولوی عبدالاحد فضلي او د یاد ولایت یو شمېر نورو مسولینو هم شتون درلود، سوداګرو او پانګوالو د مسولینو د خدماتو او د اسلامي امارت له لوري د سوداګري او پانګونې لپاره د اړینو اسانتیاوو په برابرولو خوښي څرګنده کړې او دا مهم اقدامات یې د ټولو افغانانو په ګټه بللی دي.

دغه‌راز دوی د امنیت ټینګښت د خلکو د خوښۍ سرچینه بللی او زیاته کړې یې ده، چې په هېواد کې د سوداګرۍ او پانګونې د ښو فرصتونو رامنځته کېدل د زیاتو کورنیو او بهرنیو سوداګرو او پانګوالو د هڅونې لامل شوی.

د رياست الوزرا اداري مرستيال مولوي عبدالسلام حنفي ویلي، اسلامي امارت اقتصادي ودې او په هېواد کې د پرمختګ د زمینو رامنځته کېدو ته ژمن دی او کوښښ کوي په دې برخه کې ارزښتناک اقدامات وکړي.

نوموړي زیاته کړې، اسلامي امارت ټول هغه موارد ارزولي، چې په هېواد کې د سوداګرۍ او پانګونې د ځلېدو لامل ګرځي او د هغوی د ملاتړ لپاره به لا زیات مهم ګامونه واخلي.

مولوی عبدالسلام حنفي همدارنګه د راستنو شویو کډوالو موضوع ته اشاره کړې او له ټولو هېوادوالو په ځانګړې توګه له سوداګرو او پانګوالو یې غوښتي، چې د خپل توان په اندازه له کډوالو سره مرسته وکړي، ترڅو سوړ ژمی له ستونزو پرته تېر کړي او ورځني ژوند ته دوام ورکړي.

یو زورور ژمنی توپان چې په دې وروستیو ورځو کې یې د امریکا ګڼې برخې ځپلې دي، تر اوسه یې لږ تر لږه ۲۲ کسان وژلي او د دغه هېواد ښاري او ترانسپورټي بنسټونو ته یې پراخ زیان اړولی دی.

د نیویارک ټایمز ورځپاڼې د راپور له مخې، له دغه توپان سره د واورې دروند ورښت او کنګل مل دي او تر اوسه یې د امریکا ۱۹ ایالتونه اغېزمن کړي دي.

ورته مهال، یاد توپان په پراخه کچه د برېښنا د پرې کېدو لامل شوی او د تېرې ورځې تر پایه نږدې ۷۰۰ زره کورونه او د کارځایونه له برېښنا بې‌برخې شوي دي.

سربېره پر دې، دغه توپان د امریکا په هوايي ترانسپورټ کې هم پراخه ګډوډي رامنځته کړې او په لسګونو هوايي ډګرونو کې زرګونه الوتنې لغوه یا ځنډول شوې دي.

د اطلاعاتو او کلتور وزارت د خپرونو چارو مرستیال مولوي حیات‌الله مهاجر فراهي په مشرۍ د کتاب ارزونې کمېسیون نوبتي ناسته ترسره شوه.

اطلاعاتو او کلتور وزارت وايي، په یاده ناسته کې هغو کتابونو ته د چاپ اجازه ورکړل شوه چې له اسلامي او افغاني ارزښتونو سره برابر وو او همدارنګه د وارده او صادره ۵۸۲ ټوکو کتابونو په اړه لازمې پرېکړې وشوې.

د ناستې په پای کې، د کمېسیون غړو ته ۲۰ عنوانه کتابونه ووېشل شول، تر څو راپور یې په راتلونکي ناسته کې وړاندې کړي.

فاریاب کې د راستنو شویو کډوالو د ملاتړ او وضعیت د ارزونې په موخه، د غنمو او نغدي پیسو د وېش مراسم د ریاست‌الوزرا د اداري مرستیال مولوي عبدالسلام حنفي، د کرنې، اوبو لګولو او مالدارۍ وزیر مولوي عطاءالله عمري او د یاد ولایت د یو شمېر ځایي چارواکو په شتون کې د ولایت په مرکز میمنې ښار کې ترسره شول.

په مراسمو کې، مولوي عبدالسلام حنفي ټینګار وکړ چې اسلامي امارت په خپل توان سره د راستنو شویو کډوالو خدمت کوي او د هغوی ستونزو ته رسېدنه د حکومت له اساسي مسولیتونو څخه ده.

نوموړي زیاته کړه، چې کډوالو ته د باعزته ژوند برابرول د اسلامي امارت مهم لومړیتوب دی.

همدارنګه مولوي عطاءالله عمري وویل، اسلامي امارت هڅه کوي، څو د هېواد ځورېدلي خلک په ارامه فضا کې، په اسانتیا او د راتلونکي په هیله ژوند وکړي او په بېلابېلو برخو کې له اړینو ملاتړونو برخمن شي.

ورته مهال د فاریاب والي مولوي عبدالاحد فضلي د لوړپوړو چارواکو هرکلی وکړ او د کډوالو اړتیاوو ته د رسېدنې په برخه کې د امارتي ادارو پر دوامدارې همکارۍ ټینګار وکړ.

په پای کې، هرې کډوالې کورنۍ ته پینځه زره افغانۍ نغدي پیسې او پینځه بوجۍ ۵۰ کیلویي غنم ورکړل شول.

الجزیرې خبري شبکې د روغتیایي سرچینو له قوله ویلي، چې په غزه کې د صهیونیستي رژیم د وروستیو بریدونو له امله لږ تر لږه ۳ فلسطینیان شهیدان شوي دي.

راپور زیاتوي، چې اسراییلي اشغالګرو د تېر زېږدیز کال د اکټوبر پر ۱۱مه د امریکا په منځګړیتوب د شوي اوربند راپدیخوا غزه تړانګه کې لږ تر لږه ۴۸۴ فلسطینیان شهیدان کړي او یو زرو او ۳۲۱ تنه نور یې ټپیان کړي دي.

دغه‌راز په غزه کې د صهیونیستي رژیم د نسل‌وژنې جګړه کې تر دې دمه له ۷۱ زره  او  ۶۶۰ فلسطینیان شهیدان شوي او ۱۷۱ زره او ۴۱۹ نور ټپیان شوي دي.

د اطلاعاتو او کلتور وزارت د ګرځندوی، مالي او اداري مرستیال مولوي قدرت‌الله جمال د سیاحتي او روغتیايي شرکتونو ټولنې له مسولینو سره لیدنه کړې.

په دې لیدنه کې ګرځندویانو ته د لا ښو خدماتو وړاندې کولو، د جوازونو د صادرولو د شرایطو، د سیاحتي شرکتونو د کارکوونکو په مسلکي روزلو او د چارو د لا ښه تنظیم په اړه خبرې شوې دي.

مولوي قدرت الله جمال ویلي؛ د سیاحتي شرکتونو له جوازونو څخه به ناوړه استفاده نه کیږي او هغه چاته به د سیاحتي شرکت جواز ورکول کیږي، چې ګرځندویانو ته ښه خدمات وړاندې کولای شي او د اطلاعاتو او کلتور وزارت د دې سکتور پیاوړتیا ته ژمن دی.

نوموړي زیاته کړې؛ د ټولو سیاحتي شرکتونو کارکوونکي به د اطلاعاتو او کلتور وزارت اړوند توریزم او هوټلدارۍ انسیټیوټ کې په مسلکي توګه روزل کیږي، ترڅو ګرځندویانو ته د غوره خدماتو په وړاندې کولو سره دغه سکتور پیاوړی شي.

د اطلاعاتو او کلتور وزارت د ګرځندوی، مالي او اداري چارو مرستیال مولوي قدرت الله جمال په مشرۍ د ګرځندوی اړوندو ادارو له مسؤلینو سره ناسته وکړه.

د اطلاعاتو او کلتور وزارت وایي، چې په دغه ناسته کې د ګرځندویانو لپاره د خدماتو په څرنګوالي، د ګرځندویانو د امنیت او د ویزو په برخو کې د اسانتیاوو رامنځته کولو او حج او عمرې ته د تلونکو لپاره د لا ښو شرایطو د برابرولو په اړه خبرې شوي، ترڅو د ټولو اړوند ادارو په پوره همغږۍ کورنیو او بهرنیو ګرځندویانو ته په ټولو برخو کې اړینې اسانتیاوې رامنځته شي.

په دې ناسته کې مولوي قدرت الله جمال د ګرځندوی سکتور په برخه په دوامداره همغږۍ ټینګار کړی او ویلي یې دي؛ د ګرځندوی سکتور پیاوړتیا د هېواد د اقتصاد په وده کې اغیزمن رول لري، چې د اړوندو ادارو په پوره همغږۍ سره دغه سکتور په ښه توګه وده کولای شي.

نوموړي زیاته کړې؛ د اطلاعاتو او کلتور وزارت د سیاحتي شرکتونو د لا معیاري کولو او ګرځندویانو ته د لا غوره خدماتو وړاندې کولو په برخو کې پوره هڅې کوي.

ورته مهال د بېلابېلو ادارو مسولینو د ګرځندوی سکتور په برخه کې د پوره همکاریو ډاډ څرګند کړی او د دې سکتور پیاوړتیا یې د ټولو ګډ مسولیت بللی دی.

د اطلاعاتو او کلتور وزارت وايي، د رسنیو او خبریالانو له پرله پسې شکایتونو وروسته یې د رسنیو او خبریالانو د ملاتړو بنسټونو هر اړخیزه ارزونه کړې ده.

یاد وزارت په یوه اعلامیه کې ویلي، له هر اړخیزې ارزونې وروسته څرګنده شوې چې د یو شمېر بسټونو د مسولینو غیرې  مسلکیتوب د خبریالانو او رسنیو د ستونزو د حل پر ځای خبریالانو او رسنیو ته ستونزې زیږولې او په نړیواله کچه یې د افغانستان د رسنیو بنسټونو ته زیان اړولی دی.

یاد وزارت زیاته کړې، له ارزونې وروسته پرېکړه شوې چې یوازې د درېیو بنسټونو جوازونه تمدید او د پاتې بنسټونو جوازونه یې لغوه کړي.

د دغه وزارت په وینا؛ یاده پرېکړه به له یوې خوا د خبریالانو او رسنیو د حقونو تامین سربېره د دوی نوم د ناوړه ګتې اخیستنې مخه ونیسي او له بلې‌خوا به د بنسټونو کړنې ګټورې او منظمې شي او د هغوي باور به ساتل شوي وي.

په بشکیک کې د افغانستان اسلامي امارت د سفارت سرپرست مولوي عبدالشکور حقاني د قرغیزستان د بهرنیو چارو وزارت د څلورمې سیاسي څانگې له رییس ایبېک مالابېکوویچ سره لیدنه کړې.

 قرغیزستان کې د افغانستان سفارت وايي، چې په دې لیدنه کې مولوي عبدالشکور حقاني د افغانستان او قرغیزستان ترمنځ د اړیکو پر لا پراخېدو ټینګار کړی او له سیمې سره د افغانستان د سیاسي تفاهم، اقتصادي همکاریو او اتصال د پیاوړتیا په برخه کې یې د قرغیزستان رول او دریځ مهم بللی دی.

دغه‌راز ایبېک مالابېکوویچ هم د دوه اړخیزو سیاسي او اقتصادي اړیکو له پیاوړتیا خوښي څرگنده کړې او د افغانستان د ثبات، پرمختګ او اقتصادي ودې د ملاتړ ډاډ یې څرګند کړی دی.