د ریاست الوزرا د اقتصادي کمېسیون د تخنیکي کمېټې نوبتي غونډه په مرمرینه ماڼۍ کې تر سره شوه.

 دې غونډې ته د پوهنې وزارت اړوند د خصوصي زده کړو ریاست د عوایدو د لوړوالي او غوره مدیریت طرحه او د اړتیا وړ وسایلو او تجهیزاتو د چمتو کولو پروپوزل د بحث لپاره وړاندې شول.

 له هراړخیز بحث وروسته یاده طرحه او پروپوزل د تایید وړ وبلل شول او د نهايي تصمیم نیونې په موخه اقتصادي کمېسیون ته راجع شول.

د دې طرحې او پروپوزل په تطبیق سره به د ښوونیزو زده کړو د خصوصي مرکزونو خدمات معیاري، زده کوونکو ته به مناسب فیسونه وټاکل شي او همداراز به یې ستونزو ته په وخت رسېدنه وشي.

د کډوالو او بېرته راستنېدونکو چارو وزیر مولوي عبدالکبیر خوست ته د خپل سفر په لړ کې یاد ولایت ته ‍د راستنو شویو کډوالو له استازو لیدنه وکړه.

یاد وزارت ویلي، په دې لیدنه کې نوموړي له لسګونو اړمنو راستنو شویو کورنیو سره نغدي مرسته هم کړې ده.

مولوي عبدالکبیر ویلي، چې افغانان د دین او د هېواد د خپلواکۍ د ساتنې په موخه کډوالۍ ته اړ شوي او هر راستون شوی افغان د قدر وړ دی.

نوموړي زیاته کړې، چې په ټول توان د کډوالو ستونزو ته د رسېدنې هڅې کوي او اسلامي امارت د راستنېدونکو د ښه خدمت لپاره اړوندې چارې ځینو وزارتونو او ادارو ته سپارلې دي.

دغه‌راز مولوي عبدالکبیر څرکنده کړې، چې په ټولو ولایتونو کې اړمنو راستنو شویو ته د مرستو د وېش لړۍ پیل شوې او تمه کېږي، چې زرګونو کورنیو ته به نغدي او د خوراکي توکو مرسته ووېشل شي.

همدارنګه د کډوالو او بېرته راستنېدونکو چارو وزیر له مرستندویو ادارو او خلکو څخه غوښتي، چې له راستنو شویو سره مرسته او د هغوی لاس نیوی وکړي.

د ناستې په پای کې مولوي عبدالکبیر راستنو شویو ته د نغدي مرستې د وېش پر مهال په راتلونکې کې د نورو مرستو د چمتو کولو یادونه کړې او د اړتیا په صورت کې یې د هر ډول همکارۍ ډاډ ورکړی.

د کورنیو چارو وزارت د نشه‌یي توکو پر وړاندې د مبارزې مرستیال شیخ عبدالرحمن منیر د عالیقدر امیرالمؤمنین په لارښوونه د یوه پلاوي په مشرۍ ننګرهار ته سفر کړی.

د کورنیو چارو وزارت ویاند مفتي عبدالمتین قانع وایي، ښاغلي منیر د دې ولایت له سیمه‌ییزو مسولینو سره په لیدنه کې د نشه‌یي توکو کښت، قاچاق، سوداګرۍ او کارونې پر مخنیوي ټینګار کړی دی.

د نشه‌یي توکو پر وړاندې د مبارزې مرستیال دغه راز د ننګرهار سیمه‌ییزو مسولینو ته سپارښتنه کړې، چې په دې برخه کې جدي او کوټلي ګامونه واخلي.

د روسیې د امنیت شورا رییس سرګي شویګو له خپل ایراني سیال علي لاریجاني سره په ټلیفوني خبرو کې د ایران په وروستیو لاریونونو کې بهرنۍ لاسوهنې په کلکه غندلې دي.

 انټرفاکس خبري اژانس د روسیې د امنیت شورا د رسنیز دفتر په حواله راپور ورکړی، چې په دې خبرو کې سرګي شویګو له ایران سره د روسیې د دوه اړخیزو امنیتي همکاریو د پیاوړتیا اعلان هم کړی دی.

د ریاست الوزرا مقام د دفتر لوی رییس ډاکټر ملا عبدالواسع له علماوو او متنفذینو سره په لیدنه کې د حکومت او خلکو ترمنځ د همکاریو پر پیاوړتیا ټینګار کړی. 

نوموړي ویلي، د اسلامي امارت مسولین هېوادوالو لپاره د خدماتو د ښه والي او اسانتیاوو رامنځته کولو په برخه کې دوامداره هڅې کوي.

ډاکټر ملا عبدالواسع د خپلو خبرو په پای کې ویلي، دغه اوسنی نظام د افغانانو د بېدرېغه قربانیو او زحمتونو په پایله کې راغلی، چې موږ یې قدرداني کوو، حکومت او ملت په خپلو کې سره همکار دي او یو پر بل اعتماد لري او دغه د همکارۍ او اعتماد روحیه به لاپیاوړې او دوامداره وساتو.

همدرانګه په دې ناسته کې د رياست الوزراء مقام د دفتر عمومي ریاست د سیاسي او ولسي چارو رییس شیخ محمود ذاکري ویلي، اسلامي نظام او ملت د یووالي او لانږدېوالي لپاره خپلې ګټورې مشورې او د ولسونو ستونزې له مقاماتو سره شریکوي.

ورته مهال علماوو او متنفذینو په بېلابېلو برخو کې د اسلامي امارت د مسولینو کړنې، خدمات او لاسته راوړنې ستایلي او د برېښنا، کرنې، ښوونې او روزنې او ترانسپورټ په برخو کې خپلې ستونزې شریکې کړې دي.

په نوي ډیلي کې د افغانستان سفارت سرپرست مفتي نوراحمد نور د هند د بهرنیو چارو وزارت د افغانستان، ایران او پاکستان د برخې له عمومي مسول انند پرکاش سره لیدنه کړې.

هند کې د افغانستان سفارت وایي، چې په دې لیدنه کې د دوه اړخیزو سیاسي او اقتصادي اړیکو، د سوداګرۍ پراختیا، د ویزو د ورکړې او د سوداګرو د ستونزو او هند کې د مېشتو افغان محصلینو په تړاو خبرې شوې دي.

د دې سفارت په وینا، دغه راز دواړو لوریو د افغانستان او هند ترمنځ د دوه اړخیزو همکاریو او تعاملاتو پر پراختیا ټینګار کړی دی.

په قطر کې د اسلامي امارت سفیر محمد سهیل شاهین په دوحه کې د افغانستان لپاره د المان له شارژدافیر رولف دیتر راینهارد سره لیدنه کړې.

قطر کې د افغانستان سفارت وایي، چې په دې لیدنه کې د روان سیاسي حالت، دوه اړخیزو اړیکو، له پاکستان او ایران څخه د راستنېدونکو افغان کډوالو د ستونزو او بشري مرستو په تړاو خبرې شوې دي.

دغه‌راز د المان شارژدافیر افغانستان ته پر خپل سفر او له نږدې د افغان چارواکو سره د ناستو په تړاو خوښي او هیله‌مندي ښودلې ده.

د ارشاد، حج او اوقافو وزارت اعلان کړی، چې د ۱۴۰۵ لمریز کال د حج لپاره د نوم‌لیکنې بهیر راتلونکې چهارشنبه د روان ۱۴۰۴ کال د مرغومي په ۲۴مه به پیل او د سلواغې میاشتې تر څلورمې به دوام ولري.

یاد وزارت له حج کوونکو غوښتي، چې کابل کې د حاجیانو مجتمع او په ولایتونو کې د ارشاد، حج او اوقافو ریاستونو ته مراجعه وکړي.

د یاد وزارت د مسولينو په خبره؛ هغه کسان، چې یو ځل يې فرضي حج ادا کړی وي، سږ کال د نفلي حج ادا کولو په موخه د نوم لیکنې اجازه نه لري؛ نو په همدې اساس يې له دوی غوښتې، چې بيا دې نومليکنه نه کوي.

د چین د بهرنیو چارو وزارت ویاند مائو نینګ د امریکا ولسمشر ډونالډ ټرمپ د څرګندونو په غبرګون کې ویلي، چې چین تل د نورو هېوادونو په کورنیو چارو کې د لاس‌وهنې مخالف و او د ټولو ملتونو د ملي حاکمیت او امنیت ملاتړ کوي؛ هغه څه چې باید د نړیوالو قوانینو له مخې په بشپړ ډول خوندي وساتل شي.

د چینایي رسنیو د راپور له مخې، د چین د بهرنیو چارو وزارت ویاند له ټولو لوریو غوښتي، چې په منځني ختیځ کې د سولې او ثبات لپاره لا زیات کوښښ وکړي او دغه راز یې هیله ښودلې چې د ایران دولت او خلک وکولای شي روان حالت کنټرول او ملي ثبات وساتي.

چین دغه غبرګون له هغې وروسته ښودلی، چې د امریکا ولسمشر ډونالډ ټرمپ ویلي و، د هغه حکومت د ایران پر وړاندې د «ځینو ډېرو پیاوړو انتخابونو» د ارزونې په حال کې دی، چې پکې د احتمالي پوځي اقدام امکان هم شامل دی.