د پاکستان د خیبرپښتونخوا ایالت د لکي مروت په سیمه کې د یوې چاودنې له امله د دوو امنیتي پولیسو په ګډون لږ تر لږه اووه تنه وژل شوي او ۲۳ نور ټپیان دي.
د پاکستان «ډان» ورځپاڼې د لکي مروت د پولیسو د ویاند قدرتالله خان له قوله راپور ورکړی، چې پېښه د سیمې په یوه ګڼ مېشته ځای کې رامنځته شوې ده.
د راپور له مخې، تر اوسه د چاودنې نوعیت او لاملونه نه دي په ډاګه شوي.
د ټولګټو ویاند محمد اشرف حق شناس وایي، چې په تېره اوونۍ کې (د ۱۴۰۵ هـ.ش. کال د غویي له ۱۱مې څخه تر۱۷مې) نېټې پورې د دې وزارت د اوسپنې پټلۍ له لارې ۲۳۵ زره او ۳۶۲ مټریک ټنه انتقالات شوي دي.
نوموړي زیاته کړې، د حیرتان بندر له لارې ۱۶۰زره او ۶۳ټنه، د آقینې بندر له لارې ۱۸ زره او ۶۹۵ټنه، د تورغونډۍ بندر له لارې ۲۳ زره او ۶۱۶ ټنه او د خواف–هرات له لارې ۳۲ زره او ۹۸۸ ټنه انتقالات ترسره شوي، چې ټولټال ۲۳۵ زره او ۳۶۲ ټنه نفتي، غیرې نفتي او نور مواد دي، هېواد ته وارد او صادر شوي دي.
د ښاغلي حق شناس د معلوماتو له مخې، د انتقالاتو له ډلې یوه برخه صادرات دي، په تېره اوونۍ کې (۱۱۹۲) ټنه صادرات شوي، چې لویه برخه وچه میوه معدني ډبرې او دانارجوس دي.
نوموړي زیاته کړې، هر څومره چې د اوسپنې پټلۍ له لارې د صادراتو او انتقالاتو کچه لوړيږي، په هماغه اندازه کاري فرصتونه برابریږي، ملي عواید زياتيږي او په ټوله کېاقتصادي ثبات، ترقۍ او ځان بسياينې ته لاره هواریږي.
دغهراز د ښاغلي حق شناس په وینا؛ ټولګټو وزارت هڅه کوي، ترڅو د لا زیاتو انتقالاتو لپاره مناسب شرایط برابر او سوداگرو ته اړین سهولتونه چمتو کړي او د ملي عوايدو د زياتوالي په موخه د ريل پټلۍ له لارې د سوداګریزو توکو د لیږد-رالیږد بهیر روان او چټک وساتي.
لامین یامال، د فوټبال نړۍ ځوان ستوري، د خپلې لوبډلې بارسلونا له لوري د هسپانیا د لالیګا سیالیو تر اتلولۍ وروسته، د فلسطین بیرغ په پورته کولو سره دغه بریا ونمانځله.
بارسلونا د روانې اوونۍ په الکلاسیکو حساسه لوبه کې د ریال مادرید په ماتولو سره د لالیګا د روان فصل اتلولي خپله کړه.
یادې لوبډلې په دې بریا سره د هسپانیا د فوټبال لیګ ۲۹مه اتلولي هم ترلاسه کړه.
لامین یامال د دوشنبې په ورځ د بارسلونا د اتلولۍ د نمانځنې او سړکیز کاروان پر مهال، د فلسطین بیرغ په لاس د رسنیو او ټولنیزو شبکو د کاروونکو پام ځان ته واړاوه، چې پراخ غبرګونونه یې راپارولي دي.
د یادونې وړ ده، چې هسپانیا د اروپايي ټولنې له هغو مخکښو هېوادونو څخه شمېرل کېږي، چې د فلسطین د خپلواک دولت د رسمیت پېژندنې ملاتړ یې کړی دی.
د کور او ښار جوړولو وزارت له لوري د استقلال استوګنیز ښارګوټي د ۱۳ نیمګړو بلاکونو د رغنیزو چارو د بیا پیل مراسم د کابل ښار په اتمه ناحیه کې ترسره شول.
په دغو مراسمو کې د کور او ښار جوړولو وزارت وزیر مولوي نجیب الله حیات حقاني، د اسلامي امارت د چارو ادارې لوی رییس شیخ نورالحق انور، د مالیې وزیر ملا محمد ناصر اخوند، د کور او ښار جوړولو وزارت د مسکن، ودانیزو چارو او د برنامو د پراختیا مرستیال مولوي ګل زرین صابر، د دغه وزارت مالي او اداري مرستیال مولوي محمد رباني ناصح او د وزارت ګڼ شمېر رییسانو ګډون کړی وو.
د کور او ښار جوړولو وزیر مولوي نجیب الله حیات حقاني ویلي، د استقلال استوګنیز ښارګوټي د ۱۳ بلاکونو رغنیزې چارې چې ۱۴۶ اپارتمانونه پکې شامل دي، د یو شمېر ستونزو له امله له اوږدې مودې راهیسې درېدلې وې او د بیت المال دغه مهمه پانګه د ویجاړي له ګواښ سره مخ وه، خو د اسلامي امارت د رهبرۍ او د وزارت د دوامدارو هڅو په پایله کې یې یو ځل بیا عملي چارې پيل شوې .
نوموړي زیاته کړې، اسلامي امارت د ملت د شتمنیو ساتنې او د نیمګړو پروژو بشپړولو ته ځانګړې پاملرنه لري او هڅه کوي هغه پروژې چې له کلونو راهیسې ځنډېدلې وې، بېرته پیل او بشپړې کړي.
دغهراز ښاغلي حقاني د پینځم مکرویانو پروژې ته په اشارې ویلي، یاده پروژه چې له تېرو یوولسو کلونو راهیسې ځنډیدلې وه، اوس یې چارې بیا پيل شوې او نږدې ۹۵ سلنه ستونزې یې حل شوې دي.
همدارنګه د اسلامي امارت د چارو ادارې لوی رییس شیخ نورالحق انور ویلي، د اسلامي امارت د رهبرۍ د هڅو او ملاتړ له امله په هېواد کې د آبادۍ او رغونې بهیر چټک شوی او د پانګونې او ودانیزو فعالیتونو لپاره مناسبه زمینه برابره شوې ده.
نوموړي د ودانیزو جوازونو او اداري پروسو د اسانتیا ډاډ ورکړی زیاته کړې یې ده، هڅه کوي اداري چارې لا ساده او چټکې شي، ترڅو د هېوادوالو ستونزو ته پر وخت رسېدنه وشي.
دغهراز، ښاغلي انور د کور او ښار جوړولو وزارت له رهبرۍ مننه کړې، چې د هېواد د ابادۍ او پرمختګ او دغه راز کډوالو ته د ځمکو د وېش په برخه کې یې اغیزمن اقدامات کړي دي او لا دوام لري.
همداراز، د حریف ساختماني شرکت رییس انجنیر عبدالجلیل حریف ژمنه کړې، چې د یادو بلاکونو پاتې رغنیزې چارې به د لسو میاشتو په موده کې د انجنیري معیارونو له مخې بشپړې کړي.
د یادونې وړ ده، چې استقلال استوګنیز ښارګوټی ټول ۴۰ بلاکونه لري، چې ډېری یې مخکې بشپړ شوي او د پاتې ۱۳ بلاکونو چارې اوس بېرته پیل شوې دي.
د ریاستالوزرا اداري مرستیال مولوي عبدالسلام حنفي د غور له والي مولوي حیات الله مبارک او مل پلاوي سره لیدنه کړې ده.
په دې لیدنه کې د غور والي د یاد ولایت د اقتصادي، ټولنیز او سیمهییز حکومتولۍ وضعیت او د محلي ادارو د فعالیتونو په اړه معلومات وړاندې کړل.
مولوي حیاتالله مبارک ویلي، د غور سیمهییز مسولین د امنیت د ټینګښت، د عامه خدمتونو د برابرولو او د خلکو، په ځانګړي ډول د راستنو شویو کډوالو د ستونزو د حل لپاره هڅې کوي.
نوموړي همداراز د مواصلاتي لارو، برېښنا، روغتیايي مرکزونو، پراختیایي پروژو او د راستنو شویو کډوالو اړوند د خلکو غوښتنې او وړاندیزونه شریک کړل.
بلخوا، مولوي عبدالسلام حنفي د غور د خلکو قربانۍ وستایلې او ویې ویل، د امنیت ټینګښت او د خلکو خدمت د اسلامي امارت له اساسي ژمنو څخه دي.
نوموړي ټینګار وکړ، چې سیمهییز مسولین باید د خلکو ستونزو ته د رسېدنې لپاره خپلې هڅې لا ګړندۍ کړي.
د ریاستالوزرا اداري مرستیال همداراز ډاډ ورکړ، چې د غور د خلکو مطرح شوې غوښتنې به د شته امکاناتو په پام کې نیولو سره و ارزول شي او لازم اقدامات به ترسره شي.
د ایران د پارلمان رییس محمد باقر قالیباف ویلي، د ایران وسلهوال ځواکونه د هر ډول تېري پر وړاندې ځواب ورکولو ته چمتو دي.
هغه ټینګار کړی چې ناسمه ستراتیژي او ناسمې پرېکړې تل ناسمې پایلې لري، او زیاته کړې یې ده چې نړۍ دا موضوع درک کړې ده.
قالیباف همدارنګه خبرداری ورکړی چې ایران د ټولو انتخابونو لپاره چمتو دی، مقابل لوری به حیران کړي.
بلخوا د امریکا ولسمشر ډونالډ ټرمپ ویلي، د واشنګټن او تهران ترمنځ له ډیپلوماټیکو لارو د روان کړکېچ د حل امکان شته.
نوموړي زیاته کړې: «زه فکر کوم دا ممکنه ده، ما له هغوی سره څلور یا پینځه ځله هوکړه کړې، خو هغوی بیا خپل نظر بدل کړی دی»
وال سټریټ ژورنال ورځپاڼې د باخبره سرچینو په حواله ویلي، چې متحده عربي اماراتو په پټه پر ایران پوځي بریدونه کړي دي.
د دې ورځپاڼې د راپور له مخې، له دې ډلې یو برید د اپریل میاشتې په لومړیو کې د فارس خلیج په لاوان ټاپو کې د نفتو پر یو چاڼځای تر سره شوی و، چې د پراخې اورلګېدنې او د تولید د خنډ لامل شوی و.
راپور کې راغلي، دغه برید د ډونالډ ټرمپ د اوربند د اعلان سره هممهاله تر سره شوی و.
د بهرنیو چارو وزیر مولوي امیرخان متقي، افغانستان لپاره د چین له ځانګړي استازي یو شیاوینګ سره د دوه اړخیزو اړیکو د پیاوړتیا، سیمهییزو مسایلو او د ارومچي د خبرو اترو د پرمختګونو په اړه خبرې کړې دي.
ښاغلي متقي په دې لیدنه کې ویلي، چې د افغانستان د بهرني سیاست مهم محورونه د سیمهییز ثبات، توازن، اقتصادي همکارۍ او متقابل درناوي پر بنسټ ولاړ دي، او ټینګار یې کړی چې د خبرو اترو بریا د عملي ګامونو، د باور فضا د پیاوړتیا او د تاوتریخوالي په کمولو پورې تړلې ده.
بلخوا د چین ځانګړي استازي د جدي تعامل، د باور جوړونې او متقابل تفاهم پر اهمیت ټینګار کړی او ویلي یې دي چې د ارومچي د خبرو راتلونکي پړاوونه باید د عملي پایلو لپاره زمینه برابره کړي.
همدارنګه دواړو لوریو ټینګار کړی، چې د سیمهییز ثبات او دوامداره همکاریو د پیاوړتیا لپاره باید د ارومچي خبرې د واضح، عملي او پایلهمحورې اجنډا له مخې پر مخ یوړل شي.
