په دغه نندارتون کې د ریاست‌الوزرا پر اقتصادي مرستیال سربېره د ټکنالوژۍ او تخنیک په برخه کې د ایران د ولسمشر مرستیال روح الله دهقاني فيروز آبادي او له دواړو لورو یوشمېر نورو مسولینو هم ګډون کړی و.

د ریاست‌الوزرا پر اقتصادي مرستیال ویلي؛ ایران د افغانستان یو ښه ګاونډی پاتې شوی او د تاریخ په اوږدو کې یې په بېلابېلو برخو کې له افغانانو سره همکاري کړې ده.

د نوموړي په وینا؛ ایران د نورو برخو ترڅنګ په سختو شرایطو کې د ټکنالوژۍ په برخه کې ډېر پرمختګ کړی او موږ له ایران څخه غواړو چې د ټکنالوژۍ او تخنیک په برخه کې افغان محصلینو او زده کوونکو ته د زده کړو فرصتونه برابر کړي، څو مو په دغه برخه کې شته ستونزې حل شي.

ملا عبدالغني برادر اخوند ویلي؛ افغانستان په کور دننه د تخنیکي زده کړو ښه ظرفیت او امکانات درلودل، چې له بده مرغه ۴۰ کلنې جګړې پر نورو برخو سربېره له افغانانو دا فرصت هم واخیست.

نوموړي زیاته کړې؛ اوسمهال په افغانستان کې د زده کړو ښه زمینه برابره شوې او د اسلامي امارت مسولین هڅه کوي، چې افغان ځوانانو ته د نورو برخو ترڅنګ د ټکنالوژۍ او تخنیک په برخه کې هم د زده کړو او پرمختګ زمینه برابره کړي.

له دغه نندارتون څخه د لیدنې پر مهال د ټکنالوژۍ او تخنیک په برخه کې د ایران د ولسمشر مرستیال روح الله دهقاني فيروز آبادي د ریاست‌الوزرا اقتصادي مرستیال ملا عبدالغني برادر اخوند ته ډاډ ورکړی، چې ایران له افغانستان سره د ټکنالوژۍ او تخنیک په برخه کې پوره همکارۍ ته چمتو دی.

د المپيک ملي کمېټې او سپورټ عمومي ریاست درې کسیز لوړی پلاوي په ایران کې د میشت افغان مهاجرو ورزشکارانو د ستونزو اورېدو په موخه تهران ته تللي او هلته يې له یو شمېر افغان مهاجرو ورزشکارانو سره لیدنه کړې.

پلاوي کې د بدني روزنې او ورزش عمومي ریاست ورزشي سلاکار قاري حیات الله رحماني، د دې ادارې د پلان او پالیسۍ ریيس محمد حنیف حنفي او د اطلاعاتو او عامه پوهاوي امر محمدنعیم پرهېز شامل دی.

دغه پلاوي د هغوی د تېرو کړنو د ارزونې ترڅنګ د دوی شته ستونزې او غوښتنې اوریدلي دي.

د المپیک ملي کمېټې او سپورټ عمومي ریاست یاد پلاوي په دې ناسته کې د ایران هېواد د پلازمېنې تهران پر مهاجرو ورزشکارانو سربیره د قُم، یزد او خرسان ولایتونو له ځينو ورزشکارانو سره هم ناسته کړې او د هغوی د تېرو کړنو راپور يې اوریدلی دی.

د یاد پلاوي له لوري په ایران کې میشتو افغان مهاجرو ورزشکارانو ته ډاډ ورکړل شوی، چې د دوی شته ستونزې او غوښتې به د هېواد د ورزش ادارې د قانون له مخې د دې ادارې له رهبري سره شریکې کړي او د هغوی له لارښوونې وروسته به يې د حل فیصله وشي.

 د المپیک ملي کمېټې او سپورټ عمومي ریاست دا پلاوی به څو ورځې په تهران کې له افغان مهاجرو ورزشکارانو سره تر لیدو وروسته، هغو ولایتونو ته سفرونه وکړي، چې ګڼ شمېر افغان مهاجر ورزشکاران پکې په ورزشي فعالیتونو بوخت دي.

یاد پلاوی به د ایران دولت د ورزش ادارې او اتباعو وزارت له مسولینو او په دې هېواد کې د افغانستان اسلامي امارت له سفیر سره هم لیدنه وکړي.

د ریاست‌الوزرا اقتصادي مرستیال ملا عبدالغني برادر اخوند په تهران کې د افغانستان له سفارت د لیدنې پر مهال ویلي؛ د تېرو ۴۰ کلونو پر مهال افغانان په بهرنیو هېوادونو کې له ډېر ستونزو سره مخ وو، ژوند یې سخت او ستونزو ته یې په وخت او ښه ډول رسېدنه نه کېده، خو نن الحمدلله په افغانستان کې یو داسې نظام واک ته رسېدلی، چې هغه په رښتینې مانا د دغه ولس خدمت کوي او په دغه برخه کې خپلو مسولیتونو ته په ښه ډول متوجه دی.

نوموړي زیاته کړې؛ د افغان ولس هوساینه او رضایت زموږ یوازینۍ هیله ده او تاسې هر مسول کس باید تر حده کوښښ وکړئ، څو د هېوادوالو ستونزو ته په وخت او ښه ډول رسېدنه وکړئ.

د ښاغلي برادر اخوند په وینا؛ افغانستان هغه وخت په پښو درېدلی شي، چې حکومت د ملت خدمت وکړي او ملت له حکومت سره اوږه په اوږه په ټولو چارو کې همکاري وکړي.

ملا عبدالغني برادر اخوند همدا راز د سفارت ټولو مسولینو ته لارښوونه کړې، څو افغان محصلینو ته په ایران کې د لوړو زده کړو زمینه برابره کړي او په دغه برخه کې ټولې شته ستونزې حل کړي.

په تهران کې د افغانستان سفارت مسولینو د سفارت د فعالیتونو په اړه د ریاست‌الوزرا اقتصادي مرستیال ته خپل راپور وړاندې کړی او ویلي یي دي، چې د اسلامي امارت په راتګ سره په ایران کې د مېشت افغان کډوالو او کارکوونکو ستونزې تر ډېره حده حل شوې او هغوی ته د لازمو سهولتونو برابرولو په اړه یې له ایراني مقاماتو سره په وار وار مجلسونه کړي، چې ښه پایله یې ورکړې ده.

د سفارت مسولینو زیاته کړې، د اسلامي امارت په راتګ سره په تهران کې د افغانستان د سفارت په چارو کې هر ډول فساد ختم شوی او اوس یې د تېرو کلونو په پرتله په عوایدو کې څو برابره زیاتوالی راغلی دی.

افریقا لویه وچه کې د چاد او جنوبي افریقا هېوادونو هم له هغو اوو نورو هېوادونو سره یوځای شوي، چې غزه کې د روانې جګړې په درشل کې یې له اسرایلو سره اړیکې پرې کړې دي.

د دغو هېوادونو له ډلې په لاتیني امریکا کې د بولویا هېواد لومړنی هغه وو، چې اسرایلو سره یې په غزه کې د صهیونستي پوځیانو له لوري د ملکي وګړو د قتل عام په غبرګون کې اړیکې پرې کړې.

تر بولویا وروسته بحرین، هندوراس، چیلي، اردون، ترکیې، چاد او جنوبي افریقا هم له اسرایلو څخه خپل سفیران ورغوښتي او له دغه هېواد سره یې اړیکې پر کړې.

پر غزې د اسراییلو د هوایي بریدونو په دوام د ملګرو ملتونو سرمنشي انتوني ګویتریش وايي، چې په غزه کې هېڅ کس خوندي نه دی او جګړې دا سیمه د ماشومانو په هدیره بدله کړې ده.

ګویتریش په تازه څرګندونو کې ویلي، غزه کې هره ورځ سلګونه نجونې او هلکان وژل کېږي او هلته هېڅوک خوندي نه دي.

غزه کې د اسرایلي ځواکونو او حماس وسلوالو ترمنځ له روانې جګړې ۳۱ ورځې اوړي او تر دا مهاله په کې تر لس زرو ډېر کسان چې ښځې او ماشومان هم په کې شامل دي، وژل شوي، تر ۲۰ زرو ډېر ټپیان دي او شاوخوا ۱.۵ میلیون نور له خپلو سیمو او مېنو بېځایه شوي او اوس مهال په پنډغالو کې د ژوند سختې شپې او ورځې تېروي.

د کورنیو چارو سرپرست وزیر خلیفه سراج الدین حقاني د ترکیې نوي شارژدافیر ته د ښه راغلاست ترڅنګ په چارو کې د بریالیتوب هیله کړې او ویلي يي دي؛ د افغانستان او ترکیې اړیکې په تاریخ کې ژورې رېښې لري، دا دوه مسلمان ملتونه په سختو او ښو ورځو کې د یو بل په څنګ کې پاتې دي.

نوموړي زیاته کړې؛ زمونږ د بهرنیو چارو وزارت مسولین په ترکیه کې او تاسې په افغانستان کې دې د هغو تاریخي اړیکو پاللو او پراخولو لپاره هڅه وکړي.

ښاغلي حقاني همدا راز د ټولې اسلامي نړۍ پر وحدت ټینګار کړی.

جنک اونال د ترکیې او افغانستان د تاريخي اړیکو په بنسټ ویلي؛ دواړه ملتونه داسې ګډ ارزښتونه لري، چې د اړیکو ټینګ بنیاد یې جوړېږي، چې د دې روابطو پالل او پراخول زمونږ دنده او ماموریت دی.

نوموړي زیاته کړې، چې ترکیه په ستونزمنو حالاتو کې د افغانانو تر څنګ درېدل خپله وجیبه بولي.

شارژدافیر د امنیت ټینګښت په برخه کې د اسلامي امارت هڅې ستایلي او په وینا یې په افغانستان کې روان وضعیت د هرې ورځې په تېرېدو سره د ښه کېدو په حال کې دی.

نوموړي همدا راز د مخدره موادو پدیدې سره د اسلامي امارت پرېکنده چلند او مثمره مبارزه ستایلې او په دې برخه کې یې د همکارۍ ژمنه هم کړې.

اونال له بشري مرستو بار د اتم اورگاډي د راتلو خبره هم کړې، چې په را رسېدو سره به په افغانستان کې ګڼ شمېر خلک بشري مرستې ترلاسه کړي.

په دې غونډه کې د ریاست الوزرا د درېیو معاونیتونو اداري مسولینو او د مقام دفتر د عامه او ستراتېژیکو اړیکو مرستیال قاري عبدالستار سعید سربېره د یاد لوی ریاست ټولو ادارو رییسانو ګډون درلود.

د ریاست الوزرا د دفتر عمومي رییس ډاکتر ملا عبدالواسع د غونډې ګډونوالو ته د ښه راغلاست ترڅنګ د غونډې هدف د اداري چارو لا زیات شفافیت، منسجمول او ولس ته د اسانتیاو د برابرولو په خاطر له یوه بل سره د نظرونو تبادله، د همغږۍ زیاتوالی او شته ستونزو ته د مناسبو حللارو لټول بللي.

ډاکتر ملا عبدالواسع د تېرو اداري غونډو ارزونه مثبته بللې او ویلي يي؛ تر دې وروسته دې هره اداره د چارو د لا چټکتیا او شفافیت لپاره خپل لومړیتوبونه په ترتیب سره په اوله، دویمه او درېیمه درجه کټه ګوریو ووېشي، ترڅو په اړه یې لازم اقدامات وشي.

د ریاست الوزرا د دفتر عمومي ریاست د بشري سرچینو د تخنیک، ترانسپورټ او د تدارکاتو ریاستونو او د ریاست الوزرا د سیاسي، اقتصادي او اداري معاونیتونو اداري رییسانو په بېلابېلو برخو کې د خپلو ادارو ستونزې او وړاندیزونه د غونډې له ګډونوالو سره شریک کړي، چې تر ازاد بحث وروسته یې په اړه لازم تصمیمونه نیول شوي.

د ریاست الوزرا د دفتر لوی رییس د غوندې په پای کې ګډونوالو ته یو د بل سره د مسول کس په توګه د ګډې همکارۍ، همغږۍ، مادون سره د نرم چلند، په پوره حوصلې او اطمنان سره د کارونو ترسره کولو لارښوونې کړي.

 ملا عبدالغني برادر اخوند په ایران کې د مېشت افغان پانګوالو له لوري جوړ شوي کنفرانس ته ویلي، په تېرو ۲۰ کلونو کې د افغانانو او په ځانګړي ډول ملي سوداګرو او پانګوالو د سر او مال امنیت خوندي نه و، خو له نېکه‌ مرغه د اسلامي امارت په راتګ سره اوس په ډاډمنه فضا کې خپله سوداګري کوي.

د نوموړي په وینا؛ د اسلامي امارت په راتګ سره اقتصادي وضعیت چې له جدي ګواښ سره مخ و، اوس یې د ثبات پر مسیر ګامونه اخیستي، د هېواد د زېربنا رغولو په موخه د لویو پروژو چارې پيل شوې دي، صادراتو مو وده کړې، د اسانه پانګونې او مثمرې سوداګرۍ لپاره مو سیسټم له فساد او بیروکراسۍ څخه پاک شوی او په هېواد کې مو د پانګونې لپاره ښه زمینه برابره شوې ده.

د ریاست‌الوزرا اقتصادي مرستیال ویلي، اوسمهال په افغانستان کې د صنعت لپاره د اړتیا وړ برېښنا برابره شوې او د لا پراخوالي لپاره یې د برېښنا د تولید او هغو برېښنایي پروژو د بشپړولو هڅې روانې دي، چې چارې یې ناتکمیلې دي.

همداراز صنعتي پارکونو پراختیا موندلې، پر خامو موادو مالیه کمه شوې، د سوداګرۍ د پراختیا په موخه د لویو لارو بیارغونه پیل شوې ده، چې ښه بېلګه یې د کابل- کندهار او سالنګونو لویې لارې او د اورګاډي د شبکې جوړولو اړوند نورې پروژې دي.

د دې لارو په رغولو سره به سوداګري وده وکړي او له مرکزي اسیا څخه سویلي اسیا ته د اموالو په انتقال او ترانزیټ کې به هم ګڼې اسانتیاوې رامنځته شي.

د کورنیو تولیداتو څخه د ملاتړ په موخه پر هغو وارداتو مالیه لوړه شوې، چې موږ یې په هېواد کې تولید لرو او په کور دننه او بهر د افغاني تولیداتو لپاره نندارتونونه جوړ شوي دي.

نوموړي زیاته کړې؛ په افغانستان کې د سرتاسري امنیت په راتلو سره نه یوازې افغانانو، بلکې بهرنیو پانګوالو ته هم د پانګونې زمینه برابره شوې، چې ښه بېلګه یې له افغان پانګوالو سره په مشارکت د ترکي، ایراني، عربي، برېتانوي او نورو شرکتونو له لوري د مختلفو کانونو د استخراج قراردادونه ترلاسه کول او پانګونه ده.

ملا برادر اخوند ویلي، د دې لپاره چې پانګوال په دولتي ادارو کې سرګردان او له بیروکراسۍ سره مخ نه شي، د ریاست الوزرا د اقتصادي معاونیت تر چتر لاندې له ټولو وزارتونو او ادارو څخه جوړه یوه قوي کمېټه رامنځته شوې، څو په یو وخت کې په ټولو ادارو کې د پانګوالو کارونو ته رسېدنه وشي او په چټکۍ سره یې چارې پر مخ ولاړې شي.

د اسلامي امارت په راتګ سره په هېواد کې د امنیتي ګواښونو، اداري فساد، د نشه‌يي توکو د کښت او قاچاق پر وړاندې جدي ګامونه اخیستل شوي او د کوکنارو د کښت پر ځای غنمو، پنبې او د نورو زراعتي توکو کښت ته لومړیتوب ورکړل شوی دی.

د نوموړي په پانګوالو غږ کړی؛ چې د لومړنیو خوراکي توکو او په ښه کیفیت د درملو تولید، انرژۍ، کانونو، زراعت، ترانسپورټ، زېربناوو، مخابراتو او معلوماتي ټکنالوژۍ، روغتیا او نورو برخو کې پانګونه د دې هېواد اړتیا ده، چې شتمن وروڼه باید لومړیتوب ورکړي.

د ریاست‌الوزراء اقتصادي مرستیال زیاته کړې، افغانستان له سمتي، قومي او ژبني تعصب پرته د ټولو افغانانو کور دی او ټول یې د ابادولو مسؤلیت لري، راځئ دا کور په ګډه جوړ کړو او ولس مو له ناورین او د پردیو له احتیاجه خلاص کړو.

په ایران او نوره نړۍ کې پر مېشتو ټولو افغان کادرونو، ملي سوداګرو، صنعتکارانو او پانګوالو غږ کوم، چې راشئ، د هېواد په بېلا بېلو برخو لکه کانونو، زراعت، برېښنا تولید، بندونو جوړولو، ترانسپورت، صنعت او دې ته ورته نورو برخو کې پانګونه وکړئ او له خپلو هېوادوالو سره یوځای د هېواد د آبادۍ لپاره کار وکړئ.

موږ به خپل هېواد په خپله جوړ وو او دا د شکر ځای دی چې الله تعالی د سیمې په کچه یو غني هېواد راکړی دی.

زه یو ځل بیا پر تاسې او د نړۍ په نورو هېوادونو کې پر مېشت افغان پانګوالو غږ کوم، چې راشئ په خپل وطن کې پانګونه وکړئ، ځکه دا وطن پر تاسې حق لري، د دغه وطن په غېږه کې رالوی شوي یاست، له پاکو اوبو او ښکلې هوا مو یې استفاده کړې ده، اوس دا خاوره پر تاسې حق لري چې له ۴۰ کلونو کړاوونو او جنګونو وروسته یې له اوسني راغلي فرصت څخه په استفادې خپله شتمني په ابادولو کې مصرف کړئ.

د ریاست‌الوزرا اقتصادي مرستیال ویلي؛ عزت او ابرو په خپل کور کې وي، دا نن چې په پاکستان کې له افغان کډوالو سره څه روان دي موږ او تاسې یې ټول شاهدان یو، له خپل کور د باندې تل انسان پردی وي، ښه به وي چې له خپلو کورنیو او اولادونو سره په عزت او ابرو خپل هېواد ته راستانه شئ.

اسلامي امارت او نور ټول افغانان هغو وروڼو ته چې د کډوالۍ اوږده مسافري او جدایي یې تېره کړې ده، هرکلی وايي او تر خپل توان پورې یې ملاتړ کوي.

د کورنیو چارو وزارت اداري او مالي مرستیال مولوي نورجلال جلالي په مشری د کابل والي شیخ محمد قاسم خالد، مرستیال والي ملا محمد یونس مخلص او د مرکزي ولایتونو له امنیه قومندانانو، استخباراتو له ریسانو او تصفوي کمیسون له مسولینو سره د تصفي په موخه غونډه کړې.

په یاده غونډه کې د امنیتي او تصفیوي مرکزي کمیسون غړي مولوي عبدالرحمان لخوا د بېرته راستنیدونکو افغان کډوالو د امنیت او د چارو تنظیم په موخه د طرزالعمل متن د غونډې ګډونوالو ته واورول شو او د ځای جوړول، خوراکي توکو رسولو، روغتیایي خدمتونو او دوي ته د لا ښه امنیتي فضا برابرولو په موخه لازمې طرحې وړاندې شوې.

مولوی نور جلال جلالي ویلي؛ کوم افغان کډوال چې اوس هېواد ته راستانه شوې دي، دوی ته په ولایتو کې لازمې اسانتیاوې برابرول د اسلامي امارت له لومړيتوبونو څخه دي.

نوموړي د امنیتي مسولینو غوښتي، چې د کډوالو سره ښه سلوک وکړي او په ښه ډاډ سره یې تر خپلو کورونو او سیمو ورسوي.

کابل والي ویلي؛ هغه کډوال چې بهرنیو هېوادو کې اوسیدل او اوس خپل هېواد ته راځې نو پکار ده، چې د دوی لاسنیو وکړو او د ژوند سهولتونه ورته برابر کړو.

د امر بالمعروف نهی عن المنکر او شکایتونو اوریدلو وزارت سرپرست شیخ محمد خالد حنفي د هېواد له مخکښو څهرو او سیاسي تحلیلګرانو سره لیدنه کړې.

یاد تحلیلګران چې د هېواد له مختلفو ولایتونو څخه و پکې سیاسي تحلیلګر حمیدالله هوتک، دوکتور اسماعیل یون، محمد سلیم پيګیر،  دوکتور جنت فهیم چکري، ډاکټر زکریا، ډاکټر معین ګل څمکنی، سعید داود هاشمي، ملا عبدالبصیر او حمیم الله منګل په شمول ګڼو کسانو پکې شتون درلود.

دوي د امر بالمعروف نهی عن المنکر او شکایتونو اوریدلو وزارت اوسنی تګلاره ستایلي او ویلي يي دي؛ چې ستاسو له لوري د غلطیو پلټنه باید له پامه و نه غورځول شي، کله هم چې محتسبین تخطي کوي ډیر زر متوجه کیږی او مخنیوی یې کوی، افراط او تفریط مو نه ده کړی.

نوموړو زیاته کړې؛ چې د نظام له لوري د مخدره توکو مخنیوی، د سوالګرو ټولول، د معتادینو ټولول، د مهاجرینو د راتګ چارو ښه تنظیم، د ادارو تنظیم او امنیت ستر پرمختګ دی، چې په تیر تاریخ کې یې افغانستان کې مونږ ساری نلرو.

شیخ محمد خالد الحنفي ویلي؛ زمونږ دین د افراط او تفریط ترمنځ ده، کوم څه چې مستحب وي هغه ته د فرضیت درجه ورنه کړو، مونږ غواړو د خپل دین او کلتور سمه ترجماني وکړو.

هره کړنه مو باید د شریعت له مخې وي ځکه شریعت زمونږ معیار دی، د ښوونځي او مدرسې لرې والی، چې په تیر کې د اغیارو له لوري رامنځته شوی و، باید له منځه یوړل شي او زمونږ اړوند هر وخت اصلاحي نیوکه او مشوره راسره شریکولی شئ.