د صنعت او سوداګرۍ وزارت وایي؛ صنعتکارانو ته په هېواد کې د صنعتي پارکونو د ځمکو د وېش په تړاو د امیر المومنین حفظه الله فرمان توشیح شوی، چې دې وزارت ته د ځمکو له تسلیمېدو وروسته به په صنعتکارانو ځمکې ووېشي.

ها خوا د صنعتکارانو ټولنه د هېواد د صنعت د پیاوړتیا په برخه کې د صنعتي ځمکو وېش ګټور او د وخت اړتیا بولي.

دوی وایي، څومره ژر چې کېدی شي د صنعتي ځمکو د وېش لړۍ دې پیل، چې په دې سره به د صنعتکارانو ستونزې هوارې شي.

دغه راز د صنعت او سوداګرۍ وزارت زیاتوي؛ هر صنعتکار چې له غوښتنلیک سره خپل سوداګریز پلان، د غوښتل شوې ځمکې نقشه، د جواز، تشخیصې نمبر، او شرکت د رییس او مرستیال د برقي پېژند پاڼو کاپيانو ترڅنګ د شرکت فروفایل او بانکي سټېټمینت ولري د وزارت له ارزونې او منظوري وروسته ورته ځمکه ورکول کېږي.

د بلخ والي محمد یوسف وفا د قزاقستان له سفیر ګزیز اکباسوف سره لیدنه کړې.

په دې لیدنه کې د افغانستان د اقتصادي اړیکو پیاوړتیا، د دواړو هېوادونو د سوداګرو ترمنځ همغږي، د تولیداتو زیاتوالي او په افغانستان کې د پانګونې اسانتیاو په اړه خبرې کړې دي.

د بلخ ولایت مقام د رسنیز دفتر وایي؛ چې محمد یوسف وفا په دې لیدنه کې ویلي، چې د صنعت او سوداګرۍ د پرمختګ لپاره باید په حیرتان بندر کې کرنیزو محصولاتو په ځانګړې توګه د سبزیجاتو او میوو د بسته‌بندۍ او مینځلو یو مرکز جوړ شي.

په ورته وخت کې اکباسوف ویلي؛ قزاقستان غواړي د افغانستان له لارې له سویلي اسیا، روسیې، پاکستان او هند سره خپلې اړیکې پیاوړې کړي او په دې اړه څو پروژې پلي کوي.

کندهار کې د ملي دفاع وزیر مولوي محمدیعقوب مجاهد په مشرۍ د امنیتي او تصفیوي کمېسیون غونډه شوې.

د کندهار ولایت مقام رسنیز دفتر وایي، چې په دې غونډه کې د کورنیو چارو وزارت امنیتي مرستیال ملامحمد ابراهیم صدر، د کندهار والي ملا محمد شیرین اخوند، د کندهار امنیه قومندان مولوي عبدالاحد طالب او یو شمېر نورو چارواکو ګډون کړی وو.

 غونډه کې د تصفیوي چارو د لا ښه تنظیم، امنیتي وضعیت، نشه‌يي توکو د قاچاق مخنیوي، له جرمونو سره مبارزه او د سرحدونو د ساتنې په اړه خبرې شوې دي.

د هند د بهرنیو چارو وزارت ویاند رندیر جیسوال د پاکستان د څرګندونو په غبرګون کې ویلي، “موږ د پاکستان له لوري لګول شوي بې بنسټه تورونه ردوو او ټوله نړۍ خبره ده چې د نړیوالې ترهګرۍ ځاله چېرته ده.”

نوموړي زیاته کړې، چې پاکستان دې د خپلو کورنیو ستونزو او ناکامیو پړه پر نورو نه اچوي.

له دې وړاندې د پاکستان د بهرنیو چارو وزارت ویاند شفقت علي خان په یوه خبري ناسته کې هند تورن کړی و، چې ګواکې پر جعفر اېکسپرېس اورګاډي برید کې یې مرسته کړې ده.

د افغانستان د بهرنیو چارو وزیر مولوي امیر خان متقي عمان ته د سفر په ترڅ کې د یاد هېواد د سلطان د دفتر له وزیر، د سوداګرۍ او پانګونې خونې مشرانو او د اوقافو او دیني چارو وزیر سره جلا جلا لیدنې کړې دي.

مولوي امیر خان متقي د عمان د سلطان د دفتر له وزیر څخه غوښتي، چې په عمان کې بندي افغانانو ته د بند د مودې کمولو او خلاصون برخه کې مرسته وکړي او  د مېشتو افغانانو د کونسلي ستونزو د حل لپاره له افغان سفارت سره همکار پاتې شي.

ښاغلي متقي د عمان د اوقافو او دیني چارو له وزیر څخه غوښتي، چې له اسلامي امارت سره د خپلو تجربو د شریکولو ترڅنګ په افغانستان کې د جوماتونو د جوړولو په برخه کې مرسته وکړي.

ورته‌مهال د عمان سلطنت وزیر ژمنه کړې، چې د افغان بندیانو د بښنې زمینه برابره کړي او د افغانانو کونسلي خدماتو ستونزو ته د رسېدنې لپاره به لازمه همغږي وکړي.

د عمان د سوداګرۍ او پانګونې خونې له مشرانو سره په لیدنه کې هوکړه شوې، چې د دواړو هېوادونو ترمنځ سوداګریزې اړیکې پیاوړې، پانګونې ته فرصتونه برابر او مستقیمې الوتنې پیل شي.

د عمان د اوقافو او دیني چارو وزارت هم د افغانستان د ارشاد، حج او اوقافو وزارت سره د تجاربو شریکولو او همکارۍ ته چمتووالی ښودلی.

د ملي پراختیا شرکت مسولین وايي، پام کې لري چې د قوش تیپې کانال شاوخوا سیمو څخه د ښه ګټې اخیستنې په پار د نیالګیو چمتو کولو مرکز جوړ کړي.

ورته مهال د کرنې، اوبو لګولو او مالدارۍ وزارت مسولین وايي، دغه وزارت هڅه کوي چې د قوش تیپې کانال د شاوخوا سیمو زرغونتیا په موخه د هېوادوالو په مرسته د سینځلو نیالګي راټول او د قوش تیپې کانال ته يي ولېږدوي.

د یادونې ده، چې د قوش ‌تیپې کانال د افغانستان په شمال کې د اوبو د لېږد یوه ستره ملي پروژه ده، چې د امو سیند اوبه د بلخ ولایت له کلدار ولسوالۍ څخه را اخلي او د فاریاب ولایت اندخوي ولسوالۍ ته یې رسوي.