د افغانستان کرېکټ ملي لوبډلې د درې نړیوالو یو ورځنیو سیالیو د لوبلړۍ په دویمه لوبه کې له یوې هر اړخیزې لوبې وروسته کوربه زېمبابوې لوبدلې ته د ۲۳۲ منډو په توپیر ستره ماتې ورکړه او په دغه لوبلړۍ کې یې ۱-۰ مخکېوالی ترلاسه کړ.
د دغې لوبې پچه سیالې لوبډلې وګټله او لومړی یې افغان اتلانو ته د توپوهنې بلنه ورکړه.
افغان لوبډلې د دغې لوبې په لومړۍ پاڼۍ کې د خپلو شپږو لوبغاړو په زیان سره ۲۸۶ منډې جوړې کړې او سیالې لوبډلې ته یې د ۲۸۷ منډو هدف وټاکه.
د افغان لوبډلې په ګټه صدیق الله اتل ۱۰۴، عبدالمالک ۸۴، لوبډلمشر حشمت الله شهیدي ۲۹* او محمد نبي ۱۸ منډې جوړې کړې.
دا په یو ورځنیو نړیوالو سیالیو کې د صدیق الله اتل لومړنۍ سلیزه شمېرل کېږي.
دغه راز بل تکړه ښي لاسي پیلیز توپوهونکي عبدالمالک هم په نړیوالو یو ورځنیو سیالیو کې خپله لومړنۍ نیمه سلیزه جوړه کړه.
سربېره پر دې دواړو لوبغاړو د لومړۍ ویکټې لپاره د ۱۹۱ منډو ملګرتیا هم وکړه، چې د لوبې په دې بڼه کې د لومړۍ ویکټې لپاره د افغان لوبډلې دریمه او په ټوله کې ۷مه لوړه ملګرتیا وه.
حشمت الله شهیدي هم په دغه لوبه کې ۲۹ ناسوځېدلې منډې جوړې کړې، چې په توپوهنه کې یې درې څلوریزې هم شاملې وې، نوموړي په دې سره په نړیوالو یو ورځنیو سیالیو کې د خپلو څلوریزو شمېر هم ۲۰۰ ته ورسوه.
افغان اتلانو د خپل ۲۸۷ منډو هدف په دفاع کې بهترینه توپ اچونه پیل کړه او د سیالې لوبډلې لومړی لوبغاړی یې په لومړي اور کې له ډګره بهر کړ.
افغان اتلانو لومړی د فضل الحق فاروقي او عظمت الله عمرزي او وروسته د غضنفر او نوید ځدراڼ د غوره اچونې پرمټ کوربه لوبډله له سختو ستونزو سره مخ کړه او د دویمې پاڼۍ په لومړیو ۱۵ اورونو کې یې د ۴۵ منډو په بدل کې اووه سیال لوبغاړي له ډګره بهر کړل.
افغان اتلانو پاتې درې لوبغاړي په نورو ۱۵ توپونو کې له ډګره وویستل او په دې توګه یې سیالې لوبډلې ته د هغوی د ټولو لوبغاړو په بدل کې یوازې ۵۴ منډې ورکړې او د ۲۳۲ منډو په توپیر یې ستره ماتې ورکړه.
د زېمبابوې پر وړاندې د افغان اتلانو د ۲۳۲ منډو په توپیر بریا په یو ورځنیو نړیوالو سیالیو کې، د منډو له اړخه، د افغان لوبډلې تر ټولو ستره بریا ګڼل کېږي.
له دې وړاندې افغان لوبډلې د روان کال په سپتمبر میاشت کې سوېلي افریقا ته د ۱۷۷ منډو په توپیر ماتې ورکړې وه، چې هغه مهال د لوبډلې تر ټولو ستره بریا وه.
افغان اتلانو د خپلې غوره توپ اچونې په لړ کې کوربه لوبډله په منډو له ډګره بهر کړه او د منډو په توپیر یې ستره بریا خپله کړه.
د افغان لوبډلې تکړه پیلیز توپوهونکی صدیق الله اتل، چې په توپوهنه کې یې د ۱۰۴ منډو جوړولو ترڅنګ په ډګر ساتنه کې درې کېچونه هم ترلاسه کړي و، د لوبې غوره لوبغاړی ونومول شو.
په دې سره افغان لوبډلې د زېمبابوې پر وړاندې روانه لوبلړۍ کې ۱-۰ مخکېوالی ترلاسه کړ.
د دواړو لوبډلو ترمنځ لومړۍ لوبه د دوامداره ورښت له امله بې پایلې پای ته رسېدلې وه، او وروستۍ لوبه به یې د راتلونکې شنبې په ورځ په همدې هرارې کرېکټ لوبغالي کې ترسره شي.
