د راپورونو له مخې، داسې نښې لیدل کېږي چې غزه کې د اوربند په تړاو خبرې چټکې شوې او بېلابېلو اړخونو د یوې هوکړې په اړه هیلهمندي ښودلې ده.
ویل کېږي، چې حماس او اسرائیل غزه کې د اوربند او بندیانو د خلاصون تړون ته نږدې شوي دي.
حماس غورځنګ قطر کې د سېشبنې په ورځ د اوربند خبرې “پرېکنده او مثبتې” بللې او ویلي یې دي، چې که اسرائیل د نويو شرطونو له ټاکلو ډډه وکړي اوربند ممکن دی.
امریکا، قطر او مصر هم یوې هوکړې ته د رسېدو او غزه کې د ۱۴ میاشتنۍ جګړې پای ته رسولو لپاره د زیاتې لېوالتیا خبر ورکړی.
یادو هېوادونو په وروستیو اونیو کې غزه کې د اوربند په تړاو د منځګړو په توګه بیا هڅې پیل کړې دي.
اسرائیلي رسنیو هم هیلهمندي څرګنده کړې او د دوو اسرائیلي چارواکو له قوله یې ویلي، چې ښایي په یوه میاشت کې د بندیانو د خلاصون هوکړې ته ورسېږي.
د اسرائیلي رژیم دفاع وزیر اسرائیل کاتز هم ویلي، چې تر بل هر وخت یوه هوکړه نږدې ده، خو ټینګار یې کړی چې اسرائیل به له بشپړې ازادۍ سره د غزې امنیت کنټرول کړي. دا هغه څه دي، چې حماس تل رد کړي او مخالفت یې کړی دی.
فلسطیني چارواکو یو درې پړاویز پلان اعلان کړی، چې له مخې به یې غزه کې بندي ملکیان او ښځینه عسکرې په لومړي ۴۵ ورځو کې خوشي شي او اسرائیلي عسکر به د ښار له مرکزونو، ساحلي سړکونو او له مصر سره د پولې په اوږدو کې له ستراتیژیکو سیمو څخه ووځي.
دغهراز غزه کې به د بېځایه شویو لپاره یوه تګلاره جوړه شي، تر څو بېرته شمالي سیمو ته ستانه شي.
په دویم پړاو کې به پاتې بندیان خوشي شي او په درېیم پړاو کې به د جګړې له پای ته رسېدو مخکې د اسرائیلي عسکرو وتل شامل وي.
اسرائیلي یرغلګرو د ۲۰۲۳ کال د اکتوبر پر ۷مه پر غزه برید وکړ او په دې سیمه کې یې د نسل وژنې جګړه پیل کړه.
په دې جګړه کې زرګونه فلسطینیان قرباني شوي، چې ډېری یې ښځې او ماشومان دي او میلیونونه نور بېځایه شوي دي.
د ملګرو ملتونو د بشري حقونو ادارې وړاندې په یوه راپور کې ویلي و، چې غزه کې د اشغالګرو اسرائیلو د بریدونو ۷۰ سلنه قربانیان ښځې او ماشومان دي.
د فلسطین روغتیا وزارت وايي، چې د ۲۰۲۳ د اکتوبر له ۷مې راهیسې غزه کې د اسرائیلي یرغلګرو د نسل وژنې په جګړه کې لږ تر لږه ۴۵ زره او ۵۹ فلسطینیان شهیدان او ۱۰۷ زره او ۴۱ نور ټپیان شوي دي.
